གངས་ལྗོངས་དབྱངས་ཀྱི་རྒྱལ་བོ།---བདུད་བྷེ་རྗེས་སུ་དྲན་པ།
རྩོམ་པ་པོ།   ཁྲི་སྐལ་བཟང་བརྩོན་འགྲུས།     སྤེལ་དུས།  2016-03-01 22:17:16    རྡེབ་ཚད།     ཡོང་ཁུངས། ངེད་དྲ་ཚིགས།


        གངས་ལྗོངས་དབྱངས་ཀྱི་རྒྱལ་བོ།
                  ---བདུད་བྷེ་རྗེས་སུ་དྲན་པ།

        ལྷོ་མོན་ནགས་ནས་མ་འཁྲུངས།
       འདབ་ཆགས་བྱའི་ལུས་མ་བླངས།།
        གངས་ལྗོངས་ཁུ་བྱུག་སྔོན་མོར།།
        སྙན་པའི་འགྱུར་ཁུག་རྫོགས་ཡོད།།

        གང་གི་གླུ་སྐད་རེ་རེ།།
        རླུང་འཕྲིན་བརྙན་འཕྲིན་བརྒྱུད་ནས།།
        གངས་རིའི་ཕྱི་ནང་གྲགས་དུས།།
        བོད་ཡུལ་སྐྱིད་ལ་བསྐུར་སོང་།།

        མི་ཚེ་རྒྱུད་སྐུད་འཐིམས་པའི།།
        དུས་རབས་ཤིག་གི་གླུ་བ།།
        གངས་ལྗོངས་དབྱངས་ཀྱི་རྒྱལ་བོ།
        བདུད་འདུལ་རྡོ་རྗེ་ལགས་ཡིན།།

        སྙན་པའི་གླུ་གཞས་རེ་རེ།།
        ཤ་དང་རུས་ལ་ཐིམ་ཡོད།།
        དབྱངས་ཀྱི་འགྱུར་ཁུག་རེ་རེ།།
        འཚོ་བའི་རྐང་ལ་ཟུག་ཡོད།།

        རིགས་ལ་དུངས་པའི་འདུན་པ།།
        རྒྱ་མཚོའི་གཏིང་ལས་ཟབ་ཅིང་།།
        ལ་རྒྱའི་སྙིང་སྟོབས་དམར་པོ།།
        མཐོན་པོ་རི་ལས་བརྟན་པ།།

        མདོ་ཁམས་རྨ་ཡུལ་ཕྱུག་མོའི།།
        རྨ་ཀླུང་དལ་འབབ་འགྲམ་ངོགས།།
        ཐོག་མའི་ལྟེ་ཁྲག་ཐོར་ཏེ།།
        ངག་སྙན་བོད་ཡུལ་ཁྱབ་ཡོད།།

        ད་ལོ་རྐྱེན་ངན་ནད་ཀྱིས།།
        འཆི་བདག་སྒོ་དྲུང་དེད་པས།།
        བོད་མི་ཁྲི་མ་འབུམ་ལ།།
        སྡུག་གི་སྨྲེ་ངག་བྱིན་སོང་།།

        གནམ་ཟླ་དཔྱིད་ཀ་སླེབས་དུས།།
        ཁུ་བྱུག་མོན་ནས་ལོག་ཀྱང་།།
        གངས་ལྗོངས་ཁུ་བྱུག་སྔོན་མོ།།
        ལྷོ་མོན་ནགས་ལ་འཕུར་སོང་།།

        ཁུ་བྱུག་མོན་ཡུལ་ལོག་ཀྱང་།།
        སང་ལོ་ཕྱིར་ཕེབས་ཡོད་འགྲོ།།
        གངས་ལྗོངས་ཁུ་བྱུག་སྔོན་མོ།།
        ཕྱིར་ཕེབས་མེད་པས་སྐྱོ་སོང་།།

        གང་གི་གསུང་དབྱངས་དྲུག་འགྱུར།།
        གངས་ཅན་བོད་ཀྱི་ཡུལ་ལ།།
        སྐྱེ་བ་ཡང་ཡང་སྒྲོག་པའི།།
        སྨོན་ལམ་ནན་ཏན་འདེབས་སོ།།

     ཕྱི་ལོ2016 ལོའི་ཟླ2 པའི་ཚེས28 ཉིན། ཁྲི་སྐལ་བརྩོན་གྱིས་གངས་ལྗོངས་དབྱངས་ཀྱི་རྒྱལ་པོ་སྐུ་ཞབས་བདུད་བྷེ་མཆོག་ལ་རྗེས་དྲན་གྱི་ཚུལ་དུ་བྲིས་པའོ།།
                           
 

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།