ཧྥ་རན་སིའི་བོད་རིག་པའི་མཁས་པ་ཧྲི་ཐའེ་ཨན།
རྩོམ་པ་པོ།  ངེད་དྲ་ཚིགས།    སྤེལ་དུས།  2017-02-19 21:26:33    རྡེབ་ཚད།     ཡོང་ཁུངས། དྲ་རྒྱ་ལས་བཏུས་ཤིང་བསྒྲིགས།

                  1.jpg

      ཧྥ་རན་སིའི་བོད་རིག་པའི་མཁས་པ་ཧྲི་ཐའེ་ཨན Rolf Alfred Stein(1911-1999) ནི་ཧྥ་རན་སིའི་སྐད་གྲགས་ཆེ་བའི་བོད་རིག་པའི་མཁས་པ་ཞིག་ཡིན།ཁོང་ནི་འཇར་མན་གྱི་སི་ཝེེ་ཙིའི་ཇེའུ་མི་རིགས་ཀྱི་ཁྱིམ་ཚང་ཞིག་ཏུ་འཁྲུངས་ཤིང་།ན་གཞོན་སྐབས་སུ་འཇར་མན་སྦིར་ལེན་སློབ་ཆེན་ཏུ་རྒྱ་ཡིག་ཆེད་སྦྱོང་བྱས་ཏེ་སློབ་མཐར་ཕྱིན།སྤྱི་ལོ་༡༩༣༣ལོར་འཇར་མན་གྱི་ཧྥ་ཤི་སི་ལ་གཡོལ་ཆེད་དུ་ཧྥ་རན་སིར་འོངས་པ་དང་།ལོ་དེའི་ཕྱི་ལོར།ཧྥ་རན་སིའི་རྒྱལ་གཉེར་ཤར་ཕྱོགས་དེང་རབས་སྐད་བརྡའི་སློབ་གླིང་དུ་ཆས་ནས།རྒྱ་རིག་པའི་མཁས་ཆེན་གྷོ་ལན་ཡཱན(葛兰言 Marcel Granet)དགེ་རྒན་དུ་བསྟེན་ནས་མུ་མཐུད་དུ་རྒྱ་ཡིག་སྦྱངས་ཤིང་།ཞོར་ལ་སྐུ་ཞབས་ཇ་ཁེ་བྷ་ཁོ་(Jacques Bacot)དང་མཱར་སེ་ལེ་ལཱ་ལོའུ་(Marcelle Lalou)རྣམ་གཉིས་ཀྱི་མཛུབ་སྟོན་འོག་བོད་ཡིག་སྦྱངས།སློབ་མཐར་ཕྱིན་རྗེས་ཧྥ་རན་སིའི་རྒྱའི་རིག་པ་ཞིབ་འཇུག་ཁང་དུ་ཕྱག་ལས་གཉེར།འཛམ་གླིང་འཁྲུག་ཆེན་ཐེངས་གཉིས་པའི་སྐབས་སུ།ཧྲི་ཐའེ་ཨན་རྒྱ་གར་དང་ཀྲུང་གོའི་ས་མཚམས་སུ་འཇར་འགོག་དམག་འཁྲུག་ལ་ཞུགས་མྱོང་ལ།སྔ་གཞུག་ཏུ་སྒྱོགས་དམག་དང་ཧྥ་རན་སིའི་དམག་སྤྱི་པུའུ་གཉིས་ལ་ལོ་ཙཱ་བྱས་མྱོང་པ་དང་།བར་སྐབས་ཤིག་ལ་ཉི་ཧོང་བཙན་འཛུལ་དམག་གི་བཙོན་པརའང་གྱུར་མྱོང་།སྤྱི་ལོ་༡༩༤༦ལོར།ཁོང་ཧྥ་རན་སིའི་ཤར་མཐའི་སློབ་གླིང་གི་ཞིག་འཇུག་པའི་ཚུལ་གྱིས་ལས་གནས་བསྐྱར་གསོ་བྱས་ཤིང་།སློང་གླིང་གིས་ཁོ་རང་ཀྲུང་གོའི་ཁུང་མིང་དང་ཁྲེང་ཏུ།པེ་ཅིང་དང་ནང་སོག་སོགས་སུ་མངགས་ནས་བརྟག་དཔྱད་ཞིབ་འཇིག་གི་འགན་བགོས་ཤིང་ཕྱིས་སུ་པེ་ཅིང་གི་རྒྱའི་རིག་པ་ཞིབ་འཇུག་ཁང་དུ་བྱ་བ་གཉེར་བ་དང་ཀྲུང་གོར་༡༩༤༩ལོའི་བར་དུ་བསྡད།ཁོང་གིས་དགེ་རྒན་གྷོ་ལན་ཡཱན་དང་མཱར་སིེ་ལེ་རྣམ་གཉིས་ཀྱིས་བོད་རིག་པ་དང་སོག་པོ།དེ་བཞིན་བོད་རྒྱའི་མཐའ་མཚམས་མི་རིགས་ཀྱི་རིག་གནས་ལ་ཞིབ་འཇུག་བྱ་དགོས་པའི་བསླབ་བྱ་མ་བརྗེད་པར།པེ་ཅིང་དུ་སྡོད་རིང་།ནང་སོག་དང་བོད་ལྗོངས་མཐའ་མཚམས་ཁུལ་དུ་ཐེངས་མང་པོར་ལྗོངས་རྒྱུ་ལ་ཆས་ཤིང་།རཱོཀ (T.F.Rock)མཉམ་དུ་ཡུན་ནན་ལ་ཐེངས་གཅིག་ཆས་མྱོང་།སྤྱི་ལོ་༡༩༤༩ལོར་།ཧྲི་ཐའེ་ཨན་ཧྥན་རན་སིར་ཕྱིར་ལོག་ཏེ་རྒྱལ་གཉེར་དེང་རབས་ཤར་ཕྱོགས་སྐད་བརྡའི་སློབ་གླིང་གི་དགེ་རྒན་ཆེན་མོའི་འགན་བཞེས།སྐབས་འདིར་ཁོང་གིས་ཉེ་བའི་ལོ་བཅུ་གྲངས་རིང་ལ་ཨེ་ཤེ་ཡ་ཤར་མར་འཚོོལ་སྡུད་བྱས་པའི་རྒྱུ་ཆ་མཐའ་དག་ཀློག་ནུས་ཤིང་ཐོག་མར་སྤེལ་བའི་ཞིང་འཇུག་བརྩམས་ཆོས་ནི་མི་ཉག་གི་སྐོར་རེད།སྤྱི་ལོ་༡༩༥༡ལོར།གྷོ་ལན་ཡཱན་གྱི་འཕྲོ་བསྐྱངས་ནས་ཕཱ་རི་སིའི་མཐོ་རིམ་ཞིབ་འཇུག་གླིང་གི་ཆོས་ལུགས་ཚན་རིག་སྡེ་ཁག་གི་ ༼ཀྲུང་གོ་དང་ཨེ་ཤེ་ཡའི་ཤར་མཐའི་ཆོས་ལུགས་ཀྱི༽དགེ་རྒན་ཆེན་མོ་བྱས་པ་དང་།༡༩༥༧ལོར་སྡེ་ཁག་འདིའི་མིང་༼ཨེ་ཤེ་ཡའི་ཤར་མཐའ་དང་ཀྲུང་གོའི་དཔྱད་བསྡུར་ཆོས་ལུགས་རིག་པ་དང་བོད་རིག་པ༽ལ་བརྗེས་པ་དང་ཁོང་སྔར་བཞིན་དེར་དགེ་རྒན་ཆེན་མོ་བྱས།༡༡༥༤ལོ་ནས་༡༩༦༦ལོར་འབྲས་ལྗོངས་ནང་ལ་ཚུད་པ་འི་ཧི་མ་ལ་ཡའི་མཐའ་འཁོར་དུ་ཐེས་གཉིས་ལ་རྟོག་ཞིབ་དུ་ཆས།ཁོང་བོད་ཀྱི་ལོ་རྒྱུས་དང་ཆོས་ལུགས།རྩོམ་རིག་སྐད་བརྡ་སོགས་ལ་ཞིབ་འཇུག་བྱེད་རྒྱུར་ཤིན་ཏུ་དགའ་པོ་ཡོད་པས།ཞིབ་འཇུག་གི་ཁྱབ་ཁོངས་ཤིན་ཏུ་ཡངས་པའི་མཁས་པ་ཞིག་ཡིན།

           4.jpg
      ལོ་ངོ་བཅུ་ལྷག་རིང་གི་རིག་གཞུང་ཞིབ་འཇུག་ཁྲོད།ཁོང་གིས་དཔྱད་རྩོམ་དང་ཆེད་དེབ་མང་པོ་བརྩམས་ཡོད་དེ།གཙོ་བོ་འགའ་ཞིག་ནི༼གེ་སར་སྒྲུང་དང་སྒྲུང་པའི་ཞིབ་འཇུག་༽འབུམ་རམས་པའི་མཐར་ཕྱིན་དཔྱད་རྩོམ༡༩༥༩ལོར༼རྒྱ་ནག་ཞིབ་འཇུག་དཔེ་ཚོགས༽ཁྲོད་ཀྱི་དེབ་གཅིག་ཏུ་བྱས་དེ་ཕཱ་རི་སིར་པར་དུ་བསྐྲུན༼བོད་ཀྱི་ཤེས་རིག༽༼བོད་ཀྱི་ཟློས་གར༽༼བོད་ཡིག་མིང་ཁུངས་རིག་པའི་རེག་ཟིག༽༼མི་ཉག་དང་ཞི་ཞ༽༼བོད་བརྒྱུད་ནང་བསྟན་ལུགས་ཀྱི་འབག༽༼རྒྱ་བོད་འདྲེས་འཚམས་ཀྱི་ཆཱང༽༼བོད་བརྒྱུད་ནང་བསྟན་གྱི་འཆམ་དང་རྣམ་ཤེས་སྐོར་གྱི་གཞུང་ལུགས༽༼གེ་སར་རྒྱལ་པོ་འཁྲུང་ས་རབས་བྲིས་ཐང་།༽༼རྒྱ་བོད་ས་མཚམས་ཀྱི་གུ་པུ་རིགས༽༼བོད་ཀྱི་ལོ་རྒྱུས་སྙན་ངག་གི་གནའ་དཔེ༽༼གནའ་རབས་བོད་ཀྱི་ལོ་རྒྱུས་ལས་གནད་གཉིས་ཀྱི་འགྲེལ་བ༽༼བོད་ཀྱི་བླ་མ་སྙན་དངགས་པ་ཞིག༽༼འབྲུག་པ་ཀུན་ལེགས་ཀྱི་གསུངས་རྩོམ༽༼འབྲུག་པ་ཀུན་ལེགས་ཀྱི་མཛད་རྣམ་དང་མགུར་གླུ༽༼གེ་སར་སྒྲུང་གི་འཇུག་ངོག༽༼མི་ཉག་གམ་ཞི་ཞ་ཡི་རྒྱུ་ཆ་གསར་བ༽༼བོད་རྒྱའི་ཐ་སྙད་ཀྱི་གཤིབ་སྡུར་༽༼བོད་ཆོས་ཀྱི་ཞང་ཞུང་སྐད༽༼ཏུན་ཧོང་གཏེར་ཡིག་ལས་བོད་ཆོས་ཀྱི་ཆོ་གའི་སྐོར་༽སོགས་བརྩམས་ཡོད་ལ།དུས་རབས་སྔོན་མའི་ལོ་རབས་༨༠བ་ནས་བཟུང་ཁོང་གི་བརྩམས་ཆོས་འགའ་ཞིག་རྒྱ་ཡིག་ཏུ་བསྒྱུར་བས།རང་རྒྱལ་གྱི་བོད་རིག་པ་ཞིབ་འཇུག་གི་སྡེ་ཡིས་དོ་སྣང་དང་གདེངས་འཇོག་ཆེན་པོ་མཛད།བོད་ཀྱི་ལོ་རྒྱུས་སྙན་རྩོམ་གྱི་ཞིབ་འཇུག་དུས་རབས་སྔོན་པའི་ལོ་རབས་༥༠པ་ནས་བཟུང་།ཧྲི་ཐའེ་ཨན་གྱིས་བོད་ཀྱི་ལོ་རྒྱུས་སྙན་ངག་གི་ཞིབ་འཇུག་བྱ་བར་མགོ་བརྩམས།ཁོང་ལོ་རྒྱུས་སྙན་རྩོམ་རིང་མོ་༼གེ་སར་སྒྲུང༽ལ་ལོ་འགའ་ཤས་ཤིག་གི་སྔོན་ནས་སྤྲོ་བ་སྐྱེས་ཡོད་པར་འདུག་ཏེ།སྤྱི་ལོ་༡༩༤༠ལོའི་ཟླ་༥པར།ཁོང་གིས་༼བོད་ཀྱི་དམངས་ཁྲོད་ལོ་རྒྱུས་སྙན་ངག་ཅིག༽ཞེས་པའི་རྩོམ་ཡིིག་ཅིག་སྒྲོག་སྦྱངས་བྱས་འདུག་པ་དང་༡༩༥༦ལོར།ཁོང་གིས་དར་རྩེ་མདོའི་ཤིང་དཔར་ལས་བཤུས་ཏེ་བྲིས་པའི་གླིང་སྒྲུང་གི་ལེའུ་གསུམ་གྱི་ནང་དོན་སྤེལ་འདུག་ཅིང་།དེ་སྤེལ་སྐབས་སུ་ཁོང་གིས་ཧྥ་རན་སིའི་ཡིགེས་རིན་ཐང་ཅན་གྱི་དཔྱད་བརྗོད་རྩོམ་ཡིག་ཅིག་ཀྱང་བཀོད་འདུག་ལ།དུས་རྒྱུན་མི་བཀོལ་བའི་ཚིག་དབ་ཡལ་སྐད་ཐ་སྙད་ཀྱི་རེའུ་མིག་ཞིག་ཀྱང་བཟོས་འདུགཡང་ཁོང་གིས་གེ་སར་རྒྱལ་པོའི་འཇིམ་སྐུ་ལ་ཞིབ་འཇུག་བྱས་རྗེས་སུ།བོད་ཀྱི་ལོ་རྒྱུས་སྙན་རྩོམ་དང་སྙན་ངག་པའི་སྐོར་གྱི་བརྩམས་ཆོས་རིང་བོ་ཞིག་སྤེལ།ཤོག་གྲངས་༦༠༠ལྷག་ཡོད་པའི་ཁོང་གི་འབུམ་རམས་པའི་མཐར་ཕྱིན་དཔྱད་རྩོམ་འདི་ནི་བགྲང་བྱ་ཉི་ཤུ་ལྷག་གི་རིང་ལ་ཞིབ་འཇུག་བྱས་པའི་གྲུབ་འབྲས་ལ་སྤྱི་བསྡོམས་བྱ་པ་ལྟ་བུ་ཞིག་སྟེ།བོད་ཀྱི་རིག་གནས་ལོ་རྒྱུས་ཞིབ་འཇུག་གི་བྱ་བར་བྱས་རྗེས་མི་དམན་པ་བཞག་ཡོད།དེ་དང་ཞོར་ལ་ཁོང་གིས་བོད་རྒྱའི་ས་མཚམས་སུ་ཡོད་པའི་མི་རིགས་སྐོར་ལ་དཔྱད་རྩོམ་བྲིས་ཤིང་།བརྩམས་ཆོས་དེ་དག་ཏུ་ལོ་རྒྱུས་ས་བབ་དང་ངག་རྒྱུན་གཞི་གཅིག་ཏུ་འདུས་པར་བྱས་པས་སྐབས་འདིར་ཐོན་ཙ་ན་བྱེད་ཐབས་འདི་ནི་ཁོང་གི་རིག་གཞུང་ཉམས་ཞིབ་ཀྱི་ཁྱད་ཆོས་གཙོ་བོ་ཞིག་ཏུ་གྱུར་ཡོད།ལོ་རྒྱུས་སྙན་རྩོམ་ལ་ཞིབ་འཇུག་བྱས་པའི་གྲུབ་འབྲས་གལ་ཆེན།ཧྲི་ཐའེ་ཨན་གྱིས་མཐོ་རིམ་ཞིབ་འཇུག་ཁང་དུ་མགོ་བཙུགས་པའི་རིག་གཞུང་འཆད་ཁྲིད་ཀྱིས་བོད་ཀྱི་ལོ་རྒྱུས་སྙན་རྩོམ་ལ་ཞིབ་འཇུག་བྱ་བའི་མུ་སྐྱོང་བར་བྱས་ཤིང་།མཐར་ཞིབ་འཇུག་གྲུབ་འབྲས་སུ༼བོད་ཀྱི་ལོ་རྒྱུས་སྙན་རྩོམ་གྱི་གནའ་དཔེ་ཞིག་༽དང་༼གེ་སར་སྒྲུང་གི་དཔྲད་མཆན༽བརྩམས་པ་དང་འདིའི་ཕྱོགས་ལ་ཞིབ་འཇུག་བྱེད་མཁན་གྱི་སློབ་བུ་བསྐྱངས།

              2.jpg

      ༡༩༦༢ལོར།ཁོང་གིས་ཕྱིས་སུ་ཤུགས་རྐྱེན་ཆས་ཆེ་ཞིང་ཤིན་ཏུ་རྒྱུག་ཆེ་བའི་གསུང་རྩོམ༼བོད་ཀྱི་ཤེས་རིག་ལོ་རྒྱུས༽བརྩམས།ཁོང་གི་ཞིབ་འཇུག་བྱ་བའི་སྟོད་ཀྱི་ཆར་ཆོས་ཕྱོགས་ལ་དོ་སྣང་ཆེར་བྱས་མེད་པར་གཙོ་བོ་དམངས་ཁྲོད་སྲོལ་རྒྱུན་གྱི་ཕྱོགས་ཡིན་མོད་ཀྱང་།ཕྱིས་སུ་ཡུན་གྱིས་ནང་བསྟན་དང་རྒྱའི་ཏོ་ལུགས་པའི་གསུངས་རྩོམ་ཁག་ལ་ཞིབ་འཇུག་བྱས་པར་གྱུར།སྤྱི་ལོ་༡༩༦༣ལོར།ཁོང་གིས་བརྩམས་ཆོས་གལ་ཆེན་ཞིག་སྤེལ་བནི་༼སྤྱི་ལོའི་དུས་རབས་གཉིས་པའི་སྐབས་ཀྱི་ཏོ་ལུགས་པའི་ཆབ་སྲིད་དང་ཆོས་ལུགས་ལས་འགུལ་གྱི་དཔྱད་བརྗོད༽ཡིན་ལ།དེབ་འདིར་ཁོང་གིས་དུས་རབས་གཉིས་པའི་སྐབས་ཀྱི་ཏོ་ལུགས་པ་དག་གི་སྟོང་སྣང་རང་ལུགས་ཀྱི་ཕུགས་བསམ་དང་ཆོས་ཚོགས་ཀྱི་སྒྲིག་གཞི་ལ་བསྐྱར་དུ་དབྱེ་ཞིབ་བྱས་ཤིང་།རིག་གནས་ཕན་ཚུན་བར་ཐེབས་པའི་ཤུགས་རྐྱེན་ལ་བརྟག་དཔྱད་ཞིབ་མོ་བྱས་ཡོད།གསང་སྔགས།ཆོས་ལུགས་གཤིབ་བསྡུར་རིག་པ་བར་མཚོན་ན།གསང་སྔགས་ནི་ཆེས་དཀའ་བའི་ཞིབ་འཇུག་བྱ་ཡལ་ཞིག་ཡིན་པ་སྨྲོས་མ་དགོས་ཏེ།དེར་རྒྱ་གར་གྱི་ཧིན་རྡུའི་ཆོས་དང་སངས་རྒྱས་ཆོས་ལུགས་གཉིས་ཀ་འདྲེས་ཡོད་པ་མ་ཟད།ལྷག་པར་དུ་རྒྱ་གར་ནས་ཨེ་ཤེ་ཡའི་རྒྱལ་ཁབ་ཁག་ཏུ་དར་བའི་གོ་རིམ་ཁྲོད།ས་གནས་ཀྱི་ཆོས་ལུགས་ཁག་གི་ཆོ་ག་དང་ལྷ་སྲུང་ཡང་ནང་དུ་འདྲེན་པར་བྱས་པས་ན།ཡུན་གྱིས་སྤྱི་ཚོགས་རིམ་པ་སོ་སོའི་ཆོས་ལུགས་བྱེད་སྒོ་ཀུན་གྱི་ནང་དུ་འདྲེས་པར་གྱུར།སངས་རྒྱས་ཆོས་ལུགས་དང་ཏོ་ལུགས་གཉིས་ལ་མཚོན་ན།དམ་པ་དག་ནི་རྟག་པར་ཆོས་ལུགས་ཀྱི་བཅས་པ་ལས་ལྡོག་པའི་སྤྱོད་ལམ་གཉེར་བའི་སྨྱོན་པའི་བརྟུལ་ཞུགས་ཅན་སྟེ།སྔགས་ལུགས་ཀྱི་གྲུབ་ཆེན་དང་ཏོ་ལུགས་པའི་ཀྲིན་རིན་ནི་འཆལ་པོའི་བརྟུལ་ཞུགས་འཛིན་པའི་ཐད་ནས་ཤིན་ཏུ་འདྲའོ།།མདོར་ན།འདི་དག་ཡོད་ཚད་ཧྲི་ཐའེ་ཨན་གྱི་༼འབྲུག་པ་ཀུན་ལེགས་སྐོར་གྱི་བོད་ཡིག་གི་ཡིག་ཆ༽དང་༼འབྲུག་པ་ཀུན་ལེགས་ཀྱི་མཛད་རྣམ་དང་མགུར་གླུ༽༼འབྲུག་པ་ཀུན་ལེགས་ཀྱི་རྣམ་ཐར་ལས་བོད་ཡིག་གི་ཐ་སྙད་༽སོགས་ཀྱི་ནང་རྒྱས་པར་བྲིས་ཡོད།ཧྲི་ཐའེ་ཨན་གྱིས་ཧྥ་རན་སིའི་སློབ་གླིང་དུ་༡༩༨༡ལོའི་ཟླ་༡༠བརའི་རྒན་ཡོལ་བྱེད་རག་བར་དུ་དགེ་རྒན་ཆེན་མོའི་འགན་བཞེས་ཤིང་།༡༩༩༡ལོར་དགོངས་པ་རྫོགས་།བོད་ཀྱི་ལོ་རྒྱུས་སྙན་རྩོམ་དང་རིག་གནས་ལོ་རྒྱུས།ཏོ་ལུགས་ཞིབ་འཇུག་གི་ཐད་ལ་འབྲས་བུ་མི་དམན་པ་བླངས་ཡོད་ལ།ཤུལ་འཛིན་པའི་སློབ་མའང་པང་པོ་ཞིག་བསྐྱངས་ཡོད་དོ།། 

                 3.jpg


 

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།