སྨུག་པོ།
རྩོམ་པ་པོ།  ཐོག    སྤེལ་དུས།  2012-12-18 02:34:34    རྡེབ་ཚད།     ཡོང་ཁུངས། ངེད་དྲ་ཚིགས།

         སྨུག་པོ།     ཁོའི་དངོས་མིང་ལ་སྙིང་ལྕགས་རྒྱལ་ཟེར་ཞིང་།     གཡེར་ཆུང་སྙིང་ལྕགས་རྒྱལ་དུ་ཡང་འབོད།    ཁྲི་ཀ་རྫོང་འཕྲང་དམར་གྲོང་རྡལ་རྫ་དམར་གཡུ་མཚོའི་འདབས་རོལ་ནས་སྐྱེས།     ད་ལྟ་ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སློབ་གཙོ་གཞོན་པའི་འགན་ཁུར་ཡོད།    སློབ་ཆེན་གྱི་དུས་ནས་ད་ལྟའི་བར་དུ་སྙན་ངག་སོགས་བོད་རང་གི་རྩོམ་ཡིག་གང་མང་བྲིས་མྱོང་།      ༼ཉི་འོད་འཚོལ་བ༽ཞེས་པའི་བརྩམས་སྒྲུང་དེ་ལ་སོགས༼སྦྲང་ཆར༽གཙོ་བྱས་པའི་དུས་དེབ་དང་ཚགས་པར་མང་པོར་བཀོད།

ཁོའི་སྙན་ངག་བརྩམས་ཆོས།

                 རྟིང་སྐུལ།

མགོ་བོ་དགྱེ་རོགས།

མིག་ཆུ་གཏོང་མི་སྲིད་པའི་ཁྱོད།

ཕྲག་ཏུ་བབས་པ་ནི་རྡོག་ཁྲེས་ག་ལ་ཡིན།

དེ་ནི་མ་འོངས་བ་སྟེ།

ལྗིད་ཏིག་ཏིག་གི་རེ་བ་དང་།

གསེར་མདོག་གི་སྟོན་ལྗོངས་གང་ཞིག་གི་གཡབ་མོ་མིན་ནམ།

 

མགོ་བོ་དགྱེ་རོགས།

མིག་ཆུ་གཏོང་མི་སྲིད་པའི་ཁྱོད།

མཚན་མོའི་གཉིད་ཀྱང་འཕྲོག་འགྲོ་བ་དེ་རྨི་ལམ་ག་ལ་ཡིན།

དེ་ནི་འཚོ་བ་དང་བྱ་གཞག་སྟེ།

སེམས་ཀྱིས་འཐགས་པའི་དར་ཚོན་སྣ་ལྔ།

བསམ་གཞིགས་ཀྱིས་བཞེངས་པའི་བར་སྣང་གི་ཕོ་བྲང་།

 

མགོ་བོ་དགྱེ་རོགས།

མིག་ཆུ་གཏོང་མི་སྲིད་པའི་ཁྱོད།

འཁོར་བའི་ནགས་ཀློང་དེའི་རྫོབ་ཅི་འདྲའི་མཐུག

མིག་ལ་མཛེས་པ་ཐམས་ཅད་པདྨ་ག་ལ་ཡིན།

དུག་ཚེར་ཅན་དེ་ལའང་ཡིད་འགུགས་མེ་ཏོག་ཟེར།

 

མགོ་བོ་དགྱེ་རོགས།

མིག་ཆུ་གཏོང་མི་སྲིད་པའི་ཁྱོད།

ལམ་གྱི་རིང་ཚད་སེམས་ཀྱི་རྒྱ་ཁྱོན་ཡིན་པས།

རྐང་སྣེ་རྡོ་ལ་ཐོགས་པའི་སེམས་ཁྲལ་གྱིས་ཅི་བྱེད།

མིག་གིས་རྒྱང་རིང་ལ་ལྟོས་དང་།

རང་ཉིད་ཀྱི་ཕ་མཐའ་རུ་བརྒལ་ན།

ཐར་བའི་ལམ་སྣ་རྙེད་པ་མ་ཡིན་ནམ།

                     སྤྱི་ལོ༢༠༡༡ལོའི་ཟླ༡༡ཚེས༢༩ཉིན།

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།