རྗེ་ཙོང་ཁ་པ།
རྩོམ་པ་པོ།  ངེད་དྲ་ཚིགས།    སྤེལ་དུས།  2012-09-18 14:05:44    རྡེབ་ཚད།     ཡོང་ཁུངས། ངེད་དྲ་ཚིགས།

      རྗེ་ཁོང་ཉིད་སྐུ་མ་འཁྲུངས་པའི་སྔོན་ནས་བཟུང་སྐྱེས་ཆེན་དམ་པ་གང་མང་ཞིག་གིས་མ་འོངས་པར་གངས་ལྗོངས་ཙོང་ཁའི་ཡུལ་ནས་རྒྱལ་བའི་བསྟན་པ་རིན་པོ་ཆེ་སྤེལ་བར་ཐུགས་རྒྱུད་ཀྱི་ཡོན་ཏན་ཟབ་པོའི་རྒྱལ་བ་གཉིས་པ་ཞིག་འཁྲུངས་པར་མཚན་དང་ལུང་མང་དུ་གསུངས་ཡོད་དེ། 《 རྣམ་ཐར་སྐལ་ལྡན་པད་ཚལ་རྒྱས་པའི་འོད་སྟོང》་ ལས་ཀྱང་“ཁ་ཅིག་འདི་མཁས་མཆོག་དབྱིག་གཉེན་ལུང་བསྟན་པའི་ཚིག་ཡིན་གསུངས་ཀྱང་། ཡི་གེ་དང་པོ་བར་གྲགས་པ་མཚུངས་ཀྱང་། གྲགས་པ་འཛིན་པར་ཤེས་པར་བྱ། ཞེས་འབྱུང་བའི་དབྱིག་གཉེན་གྱི་མཚན་ལ་གྲགས་པ་ཞེས་མི་འབྱུང་བས་རྗེ་ཉིད་ཀྱི་ལུང་བསྟན་དུ་འཁྲུལ་བ་མེད་དོ།” ཞེས་གསུངས་ཡོད། ཡང་ 《 ལྷ་མོ་དྲི་མ་མེད་པས་ཞུས་པའི་མདོ》 ལས། “བྱང་ཕྱོགས་གངས་རིའི་རྒྱུད་ཀྱི་སར།། དགེ་བ་ལྡན་པའི་ས་ཕྱོགས་སུ།། དམ་པའི་ཆོས་ནི་རྒྱས་པར་འགྱུར།།”ཞེས་དང་། 《 མདོ་སྡེ་རྒྱན》 ལས། “དེ་ལྟར་བློ་བཟང་སྐྱོ་བ་མེད་ལྡན་བརྩེ་བ་ཅན།། སྙན་པར་རབ་གྲགས་ཆོ་ག་བཟང་ཤེས་ལྡན་པ་ཡི།། བྱང་ཆུབ་སེམས་དཔའ་ལེགས་པར་སྨྲ་བ་ཡིན་སྟེ།། བཤད་པའི་སྐྱེ་བོའི་ནང་ན་ཉི་མ་བཞིན་དུ་ལྷམ།། ” ཞེས་ཁོང་ཉིད་ཀྱིས་དགེ་ཚུལ་གྱི་སྡོམ་པ་བཞེས་ནས་གསོལ་བའི་མཚན་ཡང་གསལ་བོར་བསྟན་པ་བཅས་ལུང་མང་དུ་བསྟན་ཡོད།
      སྤྱི་ལོ1357བོད་རབ་བྱུང་དྲུག་པའི་མེ་བྱ་ལོར་མདོ་ཁམས་སྨད་ཀྱི་ཤར་ཙོང་ཁའི་ཡུལ་ཞེས་བྱ་བ་རུ་ཡབ་ད་ར་ཁ་ཆེ་ཀླུ་འབུམ་དགེ་དང་ཡུམ་ཤིང་མོ་བཟའ་ཨ་ཆོས་གཉིས་སུ་ངོ་མཚར་གྱི་ལྟས་ཅི་མ་དང་ལྡན་པའི་སྒོ་ནས་འཁྲུངས་ཤིང་། དེ་ནས་ལོ་གསུམ་ཙམ་ན་ཆོས་རྗེ་ཀརྨ་རོལ་པའི་རྡོ་རྗེ་ལས་དགེ་བསྙེན་གྱི་སྡོམ་པ་བཞེས་པའི་མཚན་ལ་ཀུན་དགའ་སྙིང་པོ་གསོལ། ཆོས་རྗེ་དོན་འགྲུབ་རིན་ཆེན་ལ་སྔོན་ནས་བཟུང་ལྟས་དུ་མ་བྱུང་བའི་དབང་གིས་རྗེ་ཉིད་ཀྱི་ཡབ་ཡུམ་ལ་རྟ་ལུག་སོགས་ཟིང་ཟིང་གི་སྤྱིན་པ་དཔག་མེད་མཛད་ནས་ཁོང་གཉིས་ཀྱི་བུ་སྤྲོ་བ་དང་བཅས་ཆོས་རྗེ་དོན་འགྲུབ་རིན་ཆེན་ལ་ཕུལ་ཞིང་། ཆོས་རྗེ་ཉིད་ཀྱིས་རྗེ་བདག་ཉིད་ཆེན་པོ་འདི་བསྟན་པ་རིན་པོ་ཆེའི་བདག་པོར་འགྱུར་བའི་ཆེད་དུ་ཐུགས་དགོངས་ཟབ་མོ་བཏང་ནས་འཇམ་དཔལ་དབྱངས་དང་དབྱངས་ཅན་མ་ལ་སོགས་པའི་སྒོ་ནས་ཤེས་རབ་འཕེལ་བའི་ཐབས་དུ་མ་མཛད་ཅིང་། ཆུ་བྱི་ལོ་སྟེ་སྤྱི་ལོ་1372ལོར་དབུས་གཙང་ཕྱོགས་སུ་འབྱོན་པར་བརྩམས་པའི་ཚེ་ཡང་ཆོས་རྗེ་ཉིད་ཀྱིས་ཕྱི་དངོས་པོ་སོགས་ཕྱོགས་གང་ཐད་ནས་མཐུན་རྐྱེན་སྦྱར་ཡོད། དགུང་ལོ་བཅུ་དྲུག་ནས་བཟུང་སྟེ་རྒྱལ་བའི་བསྟན་པ་རིན་པོ་ཆེ་འདི་ཉིད་དར་སྤེལ་དུ་གཏོང་བའི་ཆེད་དུ་གྲུབ་མཐའ་ལ་ཕྱོགས་རིས་མེད་པར་ཐུན་མོང་གི་རིག་གནས་དང་སྒོས་སུ་ཟབ་མོ་མདོ་སྔགས་ཀྱི་ཆོས་ལ་སྐོམ་པའི་ཆུ་བཞིན་དུ་སྦྱངས་ཤིང་། ཡུལ་ག་གེ་མོ་ན་གཞུང་གང་ལ་མཁས་པའི་བླ་མ་ཆེན་པོ་ཡོད་ཚེ་རྗེ་ཉིད་ཀྱིས་ལམ་གྱི་དཀའ་ཚེགས་དང་བཀྲེས་སྐོམ་ལྟོགས་གསུམ་གྱི་དཀའ་ངལ་ཁྱད་དུ་བསད་དེ་སྟོད་ནས་སྨད་དང་སྨད་ནས་སྟོད་ལ་ལན་བརྒྱ་ཕྲག་ཏུ་ཕེབས་ཤིང་དགེ་བའི་བཤེས་གཉེན་མང་པོར་བསྟེན། ཆོས་ཐམས་ཅད་ཀྱི་སྒྲོ་འདོགས་ཆོད་རག་བར་དུ་ཆོས་ལ་ཚིམ་པ་མེད་པར་སྦྱངས། 《 ཐུའུ་བཀྭན་གྲུབ་མཐའ》 ་རུ་མང་དུ་ཐོས་པ་ལུང་གི་ཡོན་ཏན་ལ་མངའ་བརྙེས་པའི་ཚུལ་བརྗོད་དུས“བཤེས་གཉེན་མཁས་པའི་དེད་དཔོན་ལ་བརྟེན་ནས། ཐོས་པའི་གྲུ་ཆེན་ལྷག་བསམ་གྱི་བ་དན་དཀར་པོ་འཕྱར་བ། བརྩོན་པའི་རླུང་ཤུགས་དྲག་པོས་བསྐྱོད་དེ། གསུང་རབ་དགོངས་འགྲེལ་དང་བཅས་པའི་རྒྱ་མཚོ་ཆེན་པོར་ཞུགས་ནས་གཞུང་དོན་ཡིད་བཞིན་གྱི་ནོར་བུ་འཚོལ་བ་ལ་བརྩོན་པ་རྒྱལ་སྲས་རྟག་ཏུ་ངུ་དང་མཚུངས་པར་མཛད་དོ།། ” ཞེས་རྗེ་ཉིད་ཀྱིས་བོད་བརྒྱུད་ནང་བསྟན་དར་སྤེལ་དུ་གཏོང་བར་ཐུགས་རིག་ཇི་འདྲའི་ཟབ་མོ་ཞིག་བཅིངས་ཡོད་པ་དང་དེའི་ཆེད་དུ་དཀའ་བ་དང་བརྩོན་འགྲུས་ཇི་འདྲ་ཞིག་སྤྱད་པ་ཡང་རྗེན་པར་མཚོན་ཐུབ།
      རྗེ་ཉིད་ཀྱིས་དགུང་ལོ་བཅུ་བདུན་ནས་སོ་དྲུག་གི་བར་དུ་ཐོས་པ་རྒྱ་ཆེན་པོ་བཙལ་ཞིང་དགུང་ལོ་སོ་བརྒྱད་ནས་བཟུང་ཆོས་རྣམས་རང་ཉིད་ཀྱི་ཐུགས་དགོངས་ལས་ཡང་ནས་ཡང་དུ་དཔྱད་པ་བྱས་ནས་སྔོན་འཕགས་བོད་ཀྱི་མཁས་ཆེན་མང་པོ་ཡང་ལོག་རྟོག་ཏུ་སོང་བའམ་ཡང་ན་མ་རྟོག་པའི་གནས་རྣམས་ཀྱི་སྒྲོ་འདོགས་བཅད། དེར་རྗེ་ཁོང་ཉིད་ཀྱིས་གསུང་བ་ནང་བཞིན་དུ་ཡང་ནས་ཡང་དུ་རྣམ་པར་དཔྱོད་ཅིག་དང་།། གོང་ནས་གོང་དུ་བློ་གྲོས་ཁྱད་ཞུགས་ནས།། ཤིན་ཏུ་ཕྲ་བའི་གནས་ཀྱང་རྟོགས་པར་འགྱུར་ཞེས་པའི་དགོངས་པ་ལས་བྱུང་བ་ཡིན། རྗེ་ཉིད་ཀྱི་རྣམ་ཐར་དུ་“ཐེག་པ་ཆེ་ཆུང་གི་གཞུང་དོན་ཡོངས་ལ་སྒྲོ་སྐུར་གྱི་དྲི་མ་མཐའ་དག་འཁྲུད་པ 《 དྲང་བ་དང་ངེས་པའི་དོན་རྣམ་པར་འབྱེད་པ་ལེགས་བཤད་སྙིང་བོ》 ཁྱད་པར་དུ་ཐར་བའི་ནོར་གླིང་དུ་འཇུག་པར་མེད་དུ་མི་བཟོད་པ། མཐར་འཛིན་གྱི་ཆུ་བོ་ཐད་དུ་གཅོད་པའི་གྲུ་བོ་ཆེ《 དབུ་མའི་རྣམ་བཤད་ཆེན་མོ》 ” སོགས་རྨད་དུ་བྱུང་བའི་གཞུང་མང་པོ་དང་དེའི་དགོངས་འགྲེལ། ད་དུང་《 རྟེན་འབྲེལ་བསྟོད་པ》་ སོགས་ནི་ཟབ་མོ་སྟོང་བ་ཉིད་ཀྱི་གཞུང་དཔལ་མགོན་ཀླུ་སྒྲུབ་ནས་སློབ་དཔོན་ཟླ་གྲགས་སོགས་ཀྱི་དབུ་མ་སོགས་ལ་སྦྱངས་ནས་དེ་དག་ནི་རྩ་བའི་ལྟ་བར་འཁྲུལ་བ་མེད་པར་རྒྱུད་ནས་རྟོགས་ནས་བརྩམས་པ་ཡིན་ཞིང་། གཞུང་དོན་དེ་དག་གི་དོན་ལ་བསམ་ན་ལྷུན་པོའི་བརྗིད་ལྟར་ལྕི་ཤིང་། རྩོམ་སྟངས་ཀྱི་ཐད་ནས་དོན་གསལ་ཞིང་ཁ་ལ་བདེ་བའི་སྙན་ཚིག་གི་འགྱུར་དང་ལྡན་པས་དུས་ཕྱིས་ཀྱི་མཁས་པ་མང་པོའི་བསྟོད་བསྔགས་ཚད་མེད་བྱས་ཡོད་དེ། རྗེ་གུང་ཐང་བསྟན་པའི་སྒྲོན་མེས“གསུང་རབ་ཀུན་ལ་རྒྱས་བཏབ་ཕྱག་རྒྱ་སྟེ།། མཁས་པ་ཀུན་གྱི་གཙུག་ན་ནོར་བུའི་ཏོག། སྨྲ་ངན་ཀུན་ལ་དུས་ཀྱི་ཆད་པ་བཞིན།། གྱུར་པ་ཁྱོད་གསུང་རྣམ་པ་ཀུན་དང་ལྡན།། དེ་ཡི་བྲག་ཆ་ཕྱོགས་ཀྱི་རི་བོ་མགུལ།། ཀུན་ནས་བསྒྲགས་པ་མ་སྨད་རི་བོའི་དབྱངས།། རྒྱ་མཚོའི་སྐ་རགས་འཆང་བའི་འཛིན་མ་འདིར།། མཐའ་དབུས་མེད་པ་ལྷ་ཡི་རྔ་བཞིན་ཁྱབ།།” ཞེས་གསུངས་པ་དང་། ཡང་“སྲས་བཅས་རྒྱལ་བའི་དགོངས་དོན་མ་ནོར་བ།། སྟོང་དང་རྟེན་འབྱུང་ཟབ་མོའི་དེ་ཉིད་ལ།། ཡིད་ཆས་གཏིང་ནས་རྙེད་པའི་སྒོ་གཅིག་པུ།། ཁྱོད་ཀྱི་ལེགས་བཤད་རྣམས་ལས་གཞན་པ་གང་། ” ཞེས་འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོས་གསུངས། དེ་བས་ང་ཚོས་རྗེ་ཉིད་ཀྱི་གཞུང་དོན་དངོས་ལ་མ་སྦྱངས་པར་མ་གོ་ལོག་རྟོག་ཏུ་སོང་ནས་འོས་མིན་གྱི་གཏམ་ངན་སྣ་ཚོགས་བཤད་ན་དེ་ཁབ་མིག་ལས་ནམ་མཁའ་ཚོད་འཛིན་དང་ཁྱི་རྒྱགས་གནམ་ཟུག་གི་བརྟུལ་ཞུགས་ཡིན་པ་ལས་གཞན་མིན་ནོ།
      རྗེ་ཉིད་ཀྱིས་གཉལ་གྱི་ལུང་རར་ཆོས་འཁོར་བསྐོར་བ་དང་རྫིང་ཕྱིའི་བྱམས་པ་ཞིག་གསོ། ལྷ་ས་ཆོ་འཕྲུལ་སྨོན་ལམ་ཆེན་མོའི་མཆོད་པ་བཙུགས་པ།དགའ་ལྡན་ཆོ་འཕྲུལ་ཆེན་མོ་སོགས་ཀྱི་མཛད་འཕྲིན་མང་པོ་དང་། རྗེའི་དངོས་སློབ་རྒྱལ་ཚབ་དར་མ་རིན་ཆེན་དང་མཁས་གྲུབ་དགེ་ལེགས་དཔལ་བཟང་། རྗེ་དགེ་འདུན་གྲུབ། ཞང་ཞུང་ཆོས་དབང་གྲགས་པ། མུས་སད་པ་བློ་གྲོས་རིན་ཆེན་སོགས་ཕྱི་ནང་གི་རིག་གནས་མཐའ་དག་ལ་འཇུག་མཁན་གྱི་བུ་སློབ་གང་མང་བསྐྱངས་ནས་རྒྱལ་བའི་དགོངས་པ་བསྟན་པ་རིན་པོ་ཆེ་ཕྱོགས་གང་ཐད་ནས་དར་རྒྱས་སུ་འགྲོ་བར་མཛད་རྗེས་བླ་ན་མེད་པ་བཞག་ཡོད། མཐར་དགུང་ལོ་ང་དྲུག་སྟེ་སྤྱི་ལོ་1419ས་ཕག་ལོར་རྗེ་ཙོང་ཁ་པ་ཆེན་མོའི་སྐྱེས་པ་སྔོན་མའི་ལས་ཀྱིས་བྱིན་པའི་རྨད་བྱུང་གི་དོན་དང་འདུལ་བྱ་རྣམས་མ་ལུས་པར་རྫོགས་ནས་འབྲོག་རི་བོ་དགའ་ལྡན་རྣམ་པར་རྒྱལ་བའི་གླིང་ནས་དགོངས་པ་ཆོས་དབྱིངས་སུ་འཐིམས་སོ།།

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།