མཁས་དབང་དགེ་འདུན་ཆོས་འཕེལ།
རྩོམ་པ་པོ།  ངེད་དྲ་ཚིགས།    སྤེལ་དུས།  2012-09-17 22:15:19    རྡེབ་ཚད།     ཡོང་ཁུངས། ངེད་དྲ་ཚིགས།

                         gg.jpg                                             

   མཁས་པའི་དབང་པོ་དགེ་འདུན་ཆོས་འཕེལ་གྱི་འཁྲུངས་ཡུལ་ནི་མདོ་སྨད་མཚོ་སྔོན་ཞིང་ཆེན་གྱི་རེབ་གོང་ཞོ་འཕོང་ཞེས་བྱ་བར་ཡབ་སྔགས་འཆང་རྡོ་རྗེའི་མཚན་ཅན་ནམ་ཨ་ལགས་རྒྱལ་པོ་ཞེས་བྱ་བ་དང་ཡུམ་པད་མ་སྐྱིད་ཀྱི་སྲས་སུ་ཙོང་ཁའི་སྐྱེས་རིར་རབ་བྱུང་བཅོ་ལྔའི་ཆུ་མོ་ཡོས་སྟེ་སྤྱི་ལོ་༡༩༠༣ལོའི་ཧོར་ཟླ་བརྒྱད་པའི་ནང་སྐུ་བལྟམས། སྐབས་དེར་རིག་འཛིན་ཆེན་མོ་སྐུ་ཕྲེང་དགུ་པའི་ཡང་སྲིད་ཡིན་པར་ངེས་སོ་ཞེས་གྲགས་པ་ཆེན་པོ་བྱུང་ཡང་ཡབ་ཀྱིས་ཁས་ལེན་མ་གནང་། དགུང་ལོ་བདུན་ལ་ཕེབས་སྐབས་ཡབ་གཤེགས་པའི་རྗེས་སུ་ཡ་མ་བཀྲ་ཤིས་འཁྱིལ་དུ་ཁོང་ཡུམ་སྲས་གསུམ་བཞུགས། དགུང་ལོ་བརྒྱད་དགུར་ཕེབས་སྐབས་ཨ་ཁུ་བསྟན་པའི་དྲུང་ནས་ཡི་གེ་བསླབས་ནས་དགུང་ལོ་བཅུ་ནས་བཅུ་གཅིག་བར་དགོན་པ་དེའི་གྲྭ་གྲས་སུ་ཞུགས། དགེ་བཤེས་ཨ་ཁུ་ཚུལ་ཁྲིམས་ཀྱི་དྲུང་ནས་སུམ་རྟགས་དང་། སྙན་ངག་སོགས་གསན། དགུང་ལོ་བཅུ་གཉིས་སྟེང་གཙོས་གཏེར་དགོན་གྱི་མདུན་ནས་རྩ་རླུང་འཁྲིད། དགུང་ལོ་བཅོ་ལྔ་ནས་ཞྭ་དམར་པཎྚི་ཏའི་གཞིས་དགོན་རྡི་ཚ་དགོན་པར་བཞུགས་ཏེ་རིག་ལམ་གྱི་སྐོར་སོགས་སློབ་གཉེར་མཛད། དེ་ནས་དགུང་ལོ་བཅུ་བདུན་ལ་ཕེབས་སྐབས་བླ་བྲང་བཀྲ་ཤིས་འཁྱིལ་དུ་བཞུགས་ཏེ་བསྡུས་གྲྭ་ནས་བཟུང་སྟེ་མཚན་ཉིད་ཀྱི་རིག་ལ་ཁྱད་པར་སྦྱངས་ཏེ་རྡི་ཚ་དགོན་གྱི་ལ་རྒྱ་བཟུང་སྟེ་བླ་བྲང་གི་དགེ་བཤེས་མཁས་པ་དག་ལ་རྩོད་པ་བྱེད་སྐབས་འཇམ་བཞད་ཀྱི་ཡིད་ཆར་ཡང་ཁས་མ་བཞེས་པའི་རིག་ལམ་ཕྲ་མོ་སུན་འབྱིན་པར་བརྟེན་ཕྱོགས་གཅིག་ནས་མཁས་པའི་སྙན་གྲགས་འཕེལ་བ་དང་། ཕྱོགས་གཞན་ནས་ཁོང་ལ་མི་སྙན་པའི་ངག་གི་སྡང་ཟུག་ཆེ་ཙམ་ཕོག་པས་བསྐུལ་ནས་བོད་དུ་ཕེབས་དགོངས་གཏད་དེ་དགུང་གྲངས་ཉི་ཤུ་རྩ་ལྔའི་སྟེང་ལྷ་སར་ཕེབས། དེ་ནས་གདན་ས་དཔལ་ལྡན་འབྲས་དཀར་སྤུངས་པའི་ཆོས་སྡེ་ཆེན་པོའི་གྲྭ་ཚང་སྒོ་མང་དང་། ཁང་ཚན་ཀླུ་འབུམ་གྱི་ཐོབ་ཁུངས་སུ་སྒྲིགས་ཞུགས་མཛད་དེ་དགེ་བའི་བཤེས་གཉེན་ཤེས་རབ་རྒྱ་མཚོ་སོགས་མཁས་གྲུབ་དུ་མར་བསྟེན་ནས་ཆོས་གྲྭར་མཁས་པའི་གྲགས་པ་ཕྱོགས་ཀུན་ཁྱབ། འབྲས་སྤུངས་སུ་ལོ་བདུན་བཞུགས་ཏེ་གང་ཉིད་དགུང་ལོ་སུམ་ཅུ་སོ་གཉིས་ལ་ཕེབས་ཤིང་ཁྱི་ལོར་རྒྱ་གར་ནས་པཎྚི་ཏ་ར་ཧུ་ལ་ལྷ་སར་ཕེབས་ཏེ་རྒྱ་གར་དུ་ཡོད་པའི་བཀའ་བསྟན་རྣམས་ཀླ་ཀློས་འཇིགས་ཟིན་པས་དེ་དག་བོད་དཔེའི་ཐོག་ནས་རྒྱ་གར་སྐད་དུ་ཕར་བསྒྱུར་པའི་དགོས་པ་ཁྱད་ཅན་གྱི་དོན་དུ་བོད་ཀྱི་མཁས་པ་ཆེན་པོ་ཞིག་གདན་ཞུ་གནང་འདོད་ཡོད་སྐབས་དགེ་འདུན་ཆོས་འཕེལ་མཆོག་གི་མཁྱེན་དཔྱོད་དང་མཚན་སྙན་གསན་མ་ཐག་ཏུ་གང་ཞི་ཞབས་ལ་གཏུགས་ཤིང་འཕགས་ཡུལ་སམ་སྐྲི་ཏ་སྦྱངས་ཏེ་ལོ་ཙཱ་བ་ཞིག་མཛད་དགོས་པའི་བསྐུལ་མ་ཞུས་པར་ཞལ་གྱི་བཞེས། ལོ་དེར་འཕན་ཡུལ་དང་། རྭ་སྒྲེང་། གཙང་ཁུལ་སོགས་ལ་གནས་གཟིགས་དང་སྦྲགས་བལ་ཡུལ་བརྒྱུད་རྒྱ་གར་དུ་ཕེབས། ཝ་ར་ན་སི་སོགསལ་སམ་སྐྲི་ཏའི་སྐད་ལ་སྦྱངས་མཐར་སིངྒ་ལར་སློབ་གྲྭར་ཞུགས་ནས་སམ་སྐྲི་ཏ་ལ་མཁས་པར་སྦྱངས་ཏེ་པཎྚི་ཏའི་མཚན་གྱི་ཅོད་པཎ་བདག་གིར་མ་བཞེས་ཀྱང་གནས་བརྟན་སྡེ་པའི་མདོ་༼ཆོས་ཀྱི་ཚིགས་སུ་བཅད་པ༽ལ་སོགས་པ་ཐོགས་མེད་དུ་བསྒྱུར་བར་མཛད། དེ་ནས་རབ་བྱུང་བཅུ་དྲུག་པའི་ས་སྟག་སྟེ་སྤྱི་ལོ་༡༩༣༨ལོར་ཧུ་ལ་དང་རྒྱ་གར་བ་རི་མོ་མཁས་པ་གཅིག་དང་། དཔར་འདེབས་མཁན་གཅིག་བཅས་ལྷན་ཏུ་རྒྱ་གར་ནས་བོད་དུ་ཕེབས་ནས་དཔལ་ས་སྐྱའི་དགོན་པ་སོགས་དབུས་གཙང་གི་གནས་དགོན་རྙིང་པ་ཁག་ལ་རྒྱ་དཔེ་ཇི་ཙམ་བཞུགས་པ་གཟིགས་ཞིང་ཐོག་དཔེ་ཐོ་དཀར་ཆག་ཞིབ་ཚགས་བཀོད་པར་མཛད་དེ་སླར་ཡར་རྒྱ་གར་དུ་ཕྱིར་ཕེབས་གནང་། རྒྱ་གར་དུ་ཕེབས་རྗེས་དུས་དབང་གིས་ར་ཧུ་ལའི་ཐོག་མའི་བཞེད་པ་དེར་བར་གཅོད་ཀྱི་འགྱུར་བ་བྱུང་ནས་ཕྱག་ལས་ཀྱི་འཕྲོ་བསྐྱངས་མ་ཐུབ། སྐབས་དེར་དབྱིན་ཡིག་སློབ་སྦྱོན་རྒྱུན་དུ་མཛད་མུས་ནས་ཨུ་རུ་སུ་རོག་རིས་ཞེས་པ་དེའི་སར་བཞུགས་ཏེ་༼དེབ་ཐེར་སྔོན་པོ་༽དབྱིན་ཡིག་ཏུ་བསྒྱུར་བར་རོགས་མཛད་དེ་ཀུ་ལུར་ལོ་གསུམ་ཙམ་བཞུགས། དེ་ནས་ཀ་ལི་ཀ་ཏར་ཚན་པ་ཞིག་གི་ནང་ཕྱག་ལས་གནང་སྟེ་བཞུགས་སྐབས་དེ་དུས་རྒྱ་གར་དབྱིན་ཇིའི་མི་སེར་སྤེལ་ཡུལ་ཡིན་པས་དམ་པ་འདི་ཉིད་རྒྱ་གར་གཞུང་ནས་དོགས་གནས་སུ་གྱུར་ཏེ་ཕ་རན་སིར་ཕེབས་དགོངས་ཀྱང་བཀག་སྟེ་ཕེབས་མ་ཐུབ། ཁྲི་བྱང་རིན་པོ་ཆེ་དང་། བཀའ་བློན་ཀ་ཤོད་གཉིས་ཀྱིས་ལྷ་སར་ཕྱིར་ལོག་ཕེབས་དགོས་པའིབསྐུལ་མའི་ཕྱག་བྲིས་འབྱོར་བས་རྐྱེན་ཡང་བྱས་ཏེ་རྩ་བ་དམ་པ་ཉིད་བོད་མི་ལ་ཤེས་རིག་ལོ་རྒྱུས་ཀྱི་ལེགས་སྐྱེས་བཟང་པོ་འབུལ་ལོ་སྙན་པའི་དགོངས་པ་རྒྱུན་དུ་ཡོད་པས་བོད་ཤིང་བྱ་སྟེ་སྤྱི་ལོ་༡༩༤༥ལོར་ནང་རྒྱུ་རྐྱེན་སྣ་ཚོགས་ཀྱིས་བོད་ལྗོངས་ལྷ་སར་ཞལ་ཕྱོགས་ཏེ། དྭགས་ག་ཤའི་རྒྱུད་དང་ །དེ་ནས་རིམ་བཞིན་མོན་རྟ་དབང་བརྒྱུད་ལྷ་སར་ཕེབས། ལྷ་སར་བོད་ཀྱི་ལོ་རྒྱུས་དང་རིག་གནས་ཀྱི་ཞིབ་འཇུག་མཛད་དེ་ལྗགས་རྩོམ་མཛད་བཞིན་པའི་མུར་དབྱིན་ཇི་བཙན་རྒྱལ་རིང་ལུགས་པས་དེའི་སྔའི་བོད་ཀྱི་སྲིད་གཞུང་ལ་ངན་སྐུལ་བྱས་ནས་མ་ཉེས་ཁ་གཡོགས་ཀྱིས་བོད་མེ་ཁྱི་སྤྱི་ལོ་༡༩༤༦ལོའི་ཧོར་ཟླ་བཞི་པའི་ནང་ཙམ་ལ་གློ་བུར་འཛིན་བཟུང་གིས་ཁྲིམས་གཅོད་བྱས་ཐོག་ལོ་གསུམ་རིང་བཙོན་ཁང་དུ་བཞུགས་དགོས་བྱུང་ཞིང་༡༩༤༩ལོར་བཙོན་གྲོལ་ཐོབ། དེ་ནས་བོད་ཞི་བས་བཅིངས་འགྲོལ་ཐོབ་རྗེས་ཁོང་གིས་ཀྲུང་དབྱང་མི་དམངས་སྲིད་གཞུང་གི་སྐུ་ཚབ་ཀྲང་ཅིན་ཨུའི་གམ་བཅར་ལས་བྱེད་ཞིག་ལ་སྡེ་བ་གཞུང་གིས་ང་འདི་འདྲ་བཟོ་དགོས་དོན་གུང་ཁྲན་ཏང་དམར་པོ་རེད་ཟེར་བྱུང་ཞེས་ཀྱང་ཞུབ་བ་གནང་ཞིང་ལོ་དེ་གའི་ནང་དགུང་གྲངས་ཞེ་དགུར་ཕེབས་པ་བོད་རབ་བྱུང་པའི་བཅུ་དྲུག་པའི་ལྕགས་ཡོས་སྤྱི་ལོ་༡༩༥༡ལོའི་ཧོར་ཟླ་བརྒྱད་པའི་ཚེས་༡༤དགོང་དྲོའི་ཆུ་ཚོད་བཞི་པ་ཙམ་ལ་ལྷ་ས་དགའ་རུ་ཤར་དུ་སྐུ་གཤེགས་སོ།།
     ཁོང་གི་བརྩམས་ཆོས་དག་ངོ་སྤྲོད་མདོར་བསྡུས་ཙམ་བྱས་ན། ༼རྒྱལ་ཁམས་རིག་པས་བསྐོར་བའི་གསེར་གྱི་ཐང་མ༽་དང༼བོད་ཆེན་པོའི་སྲིད་ལུགས་དང་འབྲེལ་བའི་རྒྱལ་རབས་དེབ་ཐེར་དཀར་པོ༽ ༼སིང་ག་ལའི་ལམ་ཡིག༽ ༼རྒྱལ་པོ་ར་མ་ཎའི་རྟོགས་བརྗོད༽ ༼བྱ་ལེན་མའི་རྟོགས་བརྗོད༽ ནག་མོའི་ཁོལ་གྱིས་མཛད་པ་རྒྱ་གར་སྐད་ནས་བོད་སྐད་དུ་བསྒྱུར་བ༼སྒྲའི་ཟིན་བྲིས༽ ༼གངས་རིའི་སྐོར༽ ༼ཞང་དགའ་བའི་བློ་གྲོས་ལ་དྲིས་ལན༽ ༼རྟུལ་ཆུང་དཔྱད་པའི་སྐོར༽ ༼དབུ་ཚད་དཀའ་བའི་གནད༽ ༼ལུ་བྱེད་མཐའ་དཔྱད༽ ༼འདོད་པའི་བསྟན་བཅོས༽ ༼རྡི་ཚ་སྐམ་པོས་ཕུལ་བའི་ཞུ་ཡིག༽ ༼རྒྱ་གར་གྱི་གནས་ཆེན་བརྒྱད་ཀྱི་ལམ་ཡིག༽ ༼ལེགས་ལྡན་ནག་པོའི་གླུ༽ ༼རང་བཞིན་གསུམ་ངེས་པ༽ ༼གཏམ་གྱི་ཚོགས་ཉིན་མཚན་བདུན་པ༽ ༼སིང་ག་ལའི་གནས་བརྟན་སྡེ་པའི་མདོ་དྷརྨ་པ་དཱ་ཞེས་བྱ་བ༽ཆོས་ཀྱི་ཚིགས་སུ་བཅད་པ་རྒྱ་གར་སྐད་ནས་བོད་སྐད་དུ་བསྒྱུར་བ། ༼ལེགས་སྦྱར་བང་མཛོད༽སུམ་རྟགས་ཀྱི་སྐོར་ཕྲན་བུ། སྙན་ངག་གི་དཀའ་གནད་ཕྲན་བུ་རྣམས་སོ།།
 

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།