༧སྐྱབས་རྗེ་དགེ་ཀྱཱ་རིན་པོ་ཆེ་སྐུ་ཕྲེང་བརྒྱད་པ་མཚམས་སྦྱོར་མདོར་བསྡུས།
རྩོམ་པ་པོ།  ངེད་དྲ་ཚིགས།    སྤེལ་དུས།  2017-08-12 20:29:53    རྡེབ་ཚད།     ཡོང་ཁུངས། ངེད་དྲ་ཚིགས།

 རིགས་དང་དཀྱིལ་འཁོར་རྒྱ་མཚོའི་མངའ་བདག་༧སྐྱབས་རྗེ་དགེ་ཀྱཱ་རིན་པོ་ཆེ་མཚམས་སྦྱོར་མདོར་བསྡུས།

1.jpg

 ༧དགེ་ཀྱཱ་རྡོ་རྗེ་འཆང་རྗེ་བཙུན་ཆོས་ཀྱི་རྒྱལ་མཚན་དཔལ་བཟང་པོ་མཆོག

      རང་ཅག་རྣམས་ཀྱི་དྲིན་ཆེན་རྩ་བའི་བླ་མ་༧དགེ་ཀྱཱ་རྡོ་རྗེ་འཆང་རྗེ་བཙུན་ཆོས་ཀྱི་རྒྱལ་མཚན་དཔལ་བཟང་པོ་མཆོག་ནི་བོད་རབ་བྱུང་བཅུ་དྲུག་པའི་ཤིང་ཕོ་ཁྱིའི་ལོ་སྟེ། ཕྱི་ལོ་1934ལོའི་ཧོར་ཟླ་བཅུ་གཅིག་པའི་ཡར་ངོའི་ཚེས་བརྒྱད་ཉིན། ཡབ་གུ་རུ་ཚེ་བརྟན་དང་། ཡུམ་ཡེ་ཤེས་སྒྲོལ་མ་ཞེས་པ་གཉིས་ཀྱི་སྲས་སུ་བཀྲ་ཤིས་ཤིང་ངོ་མཚར་བའི་ལྟས་དང་བཅས་ཏེ་སྐུ་འབུམ་ཚོ་དྲུག་གི་ནང་གསེས་ཀླུ་འབུམ་ཚོ་བའི་རློན་པ་སྡེ་བར་སྐུ་བལྟམས། དགུང་ལོ་བདུན་པའི་སྟེང་མཁས་བཙུན་བཟང་གསུམ་གྱིས་ཐུགས་རྒྱུད་ཕྱུག་པའི་ཨ་ཀྱཱ་རིན་པོ་ཆེ་སྐུ་ཕྲེང་བདུན་པ་བློ་བཟང་བསྟན་པའི་རྒྱལ་མཚན་མཆོག་གི་སྐུ་མདུན་དུ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་དགེ་ཚུལ་གྱི་སྡོམ་པ་བཞེས་ནས་མཚན་ལ་ཆོས་ཀྱི་རྒྱལ་མཚན་ཞེས་གསོལ།
      དགུང་ལོ་བརྒྱད་པའི་སྟེང་སྐུ་འབུམ་བྱམས་པ་གླིང་དུ་ཁྲི་སར་བཀོད་ཏེ་དགོན་པའི་ཆོས་སྤྱོད་སྣ་ཚོགས་དང་ཐུན་མོང་གི་རིག་གནས་ལ་སྦྱངས།དགུང་ལོ་བཅུ་བཞིའི་སྟེང་དཔལ་ལྡན་བཤད་སྒྲུབ་གླིང་གི་ཆོས་འཁོར་དུ་ཞུགས་ནས་མདོ་སྔགས་རིག་གནས་དང་བཅས་པ་ལ་སློབ་གཉེར་མཐིལ་ཕྱིན་པ་གནང་སྟེ་དགུང་ལོ་ཉེར་གཉིས་སྟེང་གླེང་བསྲེའི་དགེ་བཤེས་བཀའ་བཅུའི་མཚན་བཏགས་དམ་བཅའ་བཞག དགུང་ལོ་ཉེར་བཞིའི་སྟེང་སྐུ་འབུམ་དགོན་པའི་མཁན་སློབ་རིམ་བྱོན་གྱི་སེང་ཁྲིར་མངའ་གསོལ་ཏེ་དགོན་པའི་སྒྲིག་ལམ་ཀུན་སྤྱོད་དང་བསླབ་པ་སློབ་གཉེར་ཚུལ་བཞིན་བསྐྱངས།དགུང་ལོ་ཉེར་ལྔ་སྟེ་ཕྱི་ལོ1958ལོར་ཡོངས་གྲགས་ལྟར་གྱི་གཡོན་ཕྱོགས་ལམ་ལུགས་ཀྱི་དབང་གིས་རྐྱེན་ངན་ལམ་འཁྱེར་གྱི་དཀའ་སྤྱད་སྡུག་རུས་མང་པོ་ལོ་ངོ་ཉེར་གཉིས་ཀྱི་རིང་ལ་མཛད།དགུང་ལོ་ཞེ་བདུན་བཞེས་པ་ཕྱི་ལོ་1979ལོར་སླར་ཡང་སྐུ་འབུམ་དུ་ཕེབས་ཏེ་གཞི་གསུམ་གྱིས་མཚོན་པའི་བསྟན་པ་རིན་པོ་ཆེ་སླར་གསོ་མཛད།དགུང་ལོ་ཞེ་དགུའི་སྟེང་གསེར་ཁང་རི་ཁྲོད་དང་གནམ་རྫོང་རྩེ། ཁྲི་ཀའི་སྲིན་པོའི་རྫ་འདབས་ཀྱི་མཚར་ལུང་བྲག་ཕུག་དང་ན་ལུང་བྲག་ཕུག་བཀྲ་ཤིས་རྩེ་སོགས་སུ་སྒྲུབ་པ་ཉམས་ལེན་མཛད། རྗེས་སུ་སྐུ་འབུམ་དང་རི་ཁྲོད་རེས་མོས་སུ་མཛད་ནས་སྒྲུབ་པ་ལ་རྩེ་གཅིག་ཏུ་གཞོལ་བ་དང་སྐལ་ལྡན་གྱི་གདུལ་བྱ་རྣམས་ལ་རབ་བྱུང་དགེ་ཚུལ་གྱི་སྡོམ་པ་གནང་བ་དང་། དབང་ལུང་རྗེས་གསུམ་གྱིས་བཀའ་དྲིན་ཚད་མེད་བསྐྱངས།
      ཕྱི་ལོ་2008ལོ་ནས་དགོན་པའི་གཞུང་དང་དད་ལྡན་སྦྱིན་བདག་རྣམས་ཀྱིས་མཐུན་རྐྱེན་སྦྱར་ཏེ་སྒར་བ་བསྐྱར་བཞེངས་མཛད། རབ་རྒྱན་ལྕགས་སྟག་ལོ་སྟེ་ཕྱི་ལོ་2010ལོའི་ཆོ་འཕྲུལ་དུས་ཆེན་གྱི་ཡར་ཚེས་བཅོ་ལྔའི་ཉིན་གྱི་ཞོགས་པར་དགོན་པའི་དོ་དམ་ཨུ་ཡོན་ལྷན་ཁང་དང་། ཚོགས་འདུས་ལྷན་རྒྱས་ཀྱི་རེ་འདུན་ལྟར་སྐུ་འབུམ་བྱམས་པ་གླིང་གི་ཚོགས་ཆེན་འདུ་ཁང་དུ་དགེ་འདུན་སྟོང་ཕྲག་འཚོགས་པའི་དབུས་སུ་གདུགས་དང་རྒྱལ་མཚན།སྤོས་དུད་རོལ་མོ་སོགས་གཟབ་རྒྱས་ཀྱི་སེར་སྦྲེང་གིས་མདུན་བསུས་ཏེ་གདན་སའི་མཁན་རབས་རིམ་བྱོན་གྱི་མི་འཇིགས་སེང་གེས་བཏེགས་པའི་གསེར་གྱི་ཁྲི་འཕང་མཐོན་པོར་སླར་ཡང་བཞུགས་ཏེ།ཁམས་གསུམ་ཆོས་ཀྱི་རྒྱལ་པོ་ཤར་ཙོང་ཁ་བ་ཆེན་པོས་མཛད་པའི་བྱང་ཆུབ་ལམ་རིམ་ཆེན་མོའི་དབུ་ནས་ཆོས་ཐུན་གཅིག་གི་གསུང་ཆོས་དང་། དགོན་པ་གྲྭ་ཚང་གི་བསླབ་པ་སློབ་གཉེར་དང་སྒྲིག་ལམ་ཀུན་སྤྱོད་སོགས་ཀྱི་སྒོ་དུ་མར་དམིགས་ནས་བླ་བརྒྱུད་ཚོགས་གཏམ་གྱི་བསླབ་བྱ་གང་ལེགས་གནང་སྟེ། རྒྱལ་བའི་བསྟན་པ་རིན་པོ་ཆེ་སྤྱི་དང་བྱེ་བྲག་གདན་ས་རང་གི་ཆོས་འཆད་ཉན་ཐོས་བསམ་སྒོམ་གསུམ་སོགས་བཤད་སྒྲུབ་ཀྱི་བསྟན་པའི་བྱ་བ་དབྱར་མཚོ་བཞིན་རྒྱས་པར་མཛད།དེ་ནས་བཟུང་དགོན་པ་གཞུང་དང་ཚོགས་འདུས་ལྷན་རྒྱས་ནས་མཎྜལ་རྟེན་དོད་ལྷ་དར་དང་བཅས་དབང་ལུང་མན་ངག་གི་ཟབ་རྒྱས་ཆོས་ཀྱི་བདུད་རྩི་གནང་བར་གསོལ་བ་ཡང་དང་ཡང་དུ་བཏབ་པ་བཞིན།སྐལ་ལྡན་བུ་སློབ་ཡོངས་ལ་ཐུགས་བརྩེ་བས་ཞལ་གྱིས་བཞེས་ཏེ་རིམ་བཞིན་འཇམ་མགོན་བླ་མ་ཙོང་ཁ་པ་ཆེན་པོའི་ཐུགས་དམ་ལྷ་ལྔ་སོགས་ཀྱིས་གཙོས་དབང་ལུང་མན་ངག་གི་ཟབ་རྒྱས་ཆོས་ཀྱི་ཆར་བ་བུམ་པ་གང་བྱོའི་ཚུལ་དུ་རྗེ་སྐུ་འབུམ་བྱམས་པ་གླིང་གི་དགེ་འདུན་པ་རྣམས་ཀྱིས་གཙོས་ཕྱོགས་མཐའ་དབུས་ཡུལ་གྲུ་དུ་མ་ནས་ཕེབས་པའི་བོད་དང་སོག་པོ། རྒྱ་དང་ཧོར་སོགས་དད་ལྡན་ཆོས་ཞུ་བ་སེར་སྐྱ་ཁྲི་ཕྲག་དུ་མ་ལ་ལེགས་པར་གནང་སྟེ་སྨིན་གྲོལ་གྱི་ལམ་ལ་བཀོད། ཁྱད་པར་དུ་སྐུ་འབུམ་བྱམས་པ་གླིང་གི་དགོན་པའི་དོ་དམ་ཁང་དང་ཚོགས་འདུས་ལྷན་རྒྱས་ཀྱིས་དཔལ་དུས་ཀྱི་འཁོར་ལོའི་དབང་མོ་ཆེའི་ཆོས་ཀྱི་ཆར་ཆེན་ཅིས་ཀྱང་འབེབ་པར་གསོལ་བ་རྩེ་གཅིག་ཏུ་བཏབ་པ་ལྟར།
      བླ་མ་རིན་པོ་ཆེ་དགུང་གྲངས་བརྒྱད་ཅུ་ལྷག་ལ་ཕེབས་ཀྱང་སྐུ་ཚེགས་དང་འོ་བརྒྱལ་སོགས་ལ་མ་འཛེམས་པར་ཐུགས་དགྱེས་བཞིན་ཞལ་བཞེས་གནང་སྟེ། དཔལ་དུས་ཀྱི་འཁོར་ལོའི་དབང་མོ་ཆེའི་ཟབ་རྒྱས་ཆོས་ཀྱི་བདུད་རྩིའི་བགོ་སྐལ། དམ་པ་བར་མ་ཆད་པ་ནས་བརྒྱུད་པ། དམ་ཚིག་གི་སེལ་མ་ཞུགས་པ། བྱིན་རླབས་ཀྱི་དྲོད་མ་ཡལ་བ་འདི། ཕྱོགས་མཐའ་དབུས་ཀྱི་ཡུལ་གྲུ་མང་པོ་ནས་ཕེབས་པའི་སྐལ་ལྡན་བུ་སློབ་གྲངས་ལས་འདས་པ་རྣམས་ལ་བརྒྱུད་ལྡན་བླ་མ་དམ་པའི་ཕྱག་བཞེས་བཞིན་དུ་ལེགས་པར་གནང་དང་གནང་།2015ལོའི་སྐུ་འབུམ་དུས་དབང་ཆེན་མོ་སྤྱི་ཟླ9བའི་ཚེས21ཉིན་ཡོངས་སུ་ལེགས་པོར་གྲུབ། རྒྱ་བོད་ཧོར་གསུམ་གྱི་དད་ལྡན་ཁྲི་ཕྲག་མང་པོ་དགོན་པའི་གླིང་བར་ཕྱི་ནང་ཀུན་དུ་འདུས་ནས་ཡོངས་ཀྱི་དགེ་བའི་བཤེས་གཉེན་ཆེན་མོ་དགེ་ཀྱཱ་རིན་པོ་ཆེའི་གསུང་གི་བདུད་རྩིས་ཚིམ་པར་བྱས།མཐར་དགུང་ལོ་གྱ་གསུམ་སྟེ་བོད་རབ་བྱུང་བཅུ་བདུན་པའི་མེ་མོ་བྱ་ལོའི་ཆུ་སྟོད་ཟླ་བའི་དཀར་ཕྱོགས་སྟོང་པ་གསུམ་པར(སྤྱི་ལོ2017ལོའི་ཟླ8པའི་ཚེས7ཉིན)སྐུ་འབུམ་བྱམས་པ་གླིང་དུ་དགོངས་པ་ཆོས་དབྱིངས་སུ་ཐིམས།
 

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།
ནང་དོན་གསར་ཤོས།
རྡེབ་ཚད་མང་ཤོས།