2015ལོའི་ཟླ10པའི་ཚེས་9ནས་11བར་བོད་ཀྱི་མཁས་དབང་ཆེན་མོ་ཆོས་རྒྱལ་ནམ་མཁའི་ནོར་བུ་ལགས་ཀྱིས་པེ་ཅིང་དུ་བོད་ཀྱི་རྫོགས་པ་ཆེན་མོའི་འཆད་ཁྲིད་གནང་བ་སོགས་ཀྱི་བྱ་འགུལ་སྤེལ་བ་སྟེ། 2015ལོའི་ཟླ10པའི་ཚེས9ཉིན། པེ་ཅིང་སློབ་གྲྭ་ཆེན་མོའི་དབྱིན་ཅེ་བྱ་འགུལ་བརྗེ་རེས་ལྟེ་གནས་སུ་ཨ་ཏི་ཡོ་ག་སྟེ། རྣལ་འབྱོར་སྤྱོད་པའི་ལྟ་སྤྱོད་དང་ཉམས་ལེན་སྐོར་གྱི་འཆད་ཁྲིད་གནང་ཞིང་། ཚོགས་ཐོག་ཏུ་པེ་ཅིང་གི་ལས་ཁུངས་དང་སློབ་གྲྭ་སོ་སོའི་མི་སྣ་མང་པོ་འཆད་ཁྲིད་ལ་ཞུགས་ཏེ་ཨ་ཏི་ཡོ་གའི་སྐོར་གྱི་ལྟ་བ་ཕན་ཚུན་བརྗེ་རེས་ཀྱིས་དྲི་བ་དྲིས་ལན་ཞུས་ཤིང་། མཇུག་མཐར་ཆོས་རྒྱལ་ནམ་མཁའི་ནོར་བུ་ལགས་ཀྱིས་བོད་ཀྱི་ན་གཞོན་རྣམས་ཀྱིས་རང་གི་སྐད་དང་ཡི་གེར་སློབ་གཉེར་བྱེད་རྒྱུར་འབད་པ་བྱེད་དགོས་པའི་གལ་ཆེན་རང་བཞིན་ནན་གྱིས་གསུངས་པའོ། །

    2015ལོའི་ཟླ10པའི་ཚེས་10ཉིན། པེ་ཅིང་གི་མ་སྐྱེས་ཨ་མ་ཞེས་པའི་བོད་ཟས་གསོལ་མགྲོན་ཁང་དུ་ཁོང་ཉིད་ཀྱི་རྒྱ་རིགས་ཀྱི་སློབ་མ་གཙོ་བྱས་པའི་སྤྱི་ཚོགས་ཀྱི་མི་སྣ་དང་ལྷན་དུ་ཁ་བརྡ་དང་བགྲོ་གླེང་གི་བྱ་འགུལ་སྤེལ་བ་དང་། 2015ལོའི་ཟླ10པའི་ཚེས11ཉིན། པེ་ཅིང་ཐུང་ཀྲིག་ཁུལ་སུང་ཀྲོང་གྲོང་བརྡལ་གྱི་སྒྱུ་རྩལ་གྲོང་སྡེའི་རི་མོ་ཁང་ཞིག་ཏུ་《རྫོགས་ཆེན་སྟེ། འཚོ་བའི་ཁྲོད་ཀྱི་རྟོགས་སད་ཀྱི་སྒྱུ་རྩལ》ཞེས་པའི་རི་མོ་འགྲེམས་སྟོན་གྱི་མཛད་སྒོ་སྤེལ་ཞིང་། འདིའི་ཉིན་འགྲེམས་སྟོན་ཁང་དུ་ཆོས་རྒྱལ་ནམ་མཁའི་ནོར་བུ་ལགས་ཀྱིས་པར་བརྒྱབ་པའི་པར་རིས་རྩ་ཆེན་དང་། འབྲེལ་ཡོད་ཀྱི་རིག་དངོས་རྩ་ཆེན། དེང་རབས་སྒྱུ་རྩལ་པས་གསལ་འགྲེལ་བྱས་པའི་རྟོགས་སད་ཀྱི་སྒྱུ་རྩལ་འགྲེམས་སྟོན་བྱས་པར་མ་ཟད། ཚོགས་ར་དངོས་སུ་རྡོ་རྗེའི་བྲོ་གར་འགྲེམས་སྟོན་ཕུན་སུམ་ཚོགས་པ་བྱས་པས། དེར་ཞུགས་ཀྱི་ཤེས་ལྡན་མི་སྣ་དག་གི་ཡིད་སེམས་དབང་མེད་དུ་བཀུགས། མཐར་ཆོས་རྒྱལ་ནམ་མཁའི་ནོར་བུ་ལགས་ཀྱིས་ཚོགས་ཞུགས་མི་སྣ་རེ་རེར་ལག་འཇུས་མཇལ་ཞུ་གནང་སྟེ་དྲན་རྟེན་གྱི་པར་བརྒྱབ་ནས་མཇུག་རྫོགས་སོ། །