༄༅།།མདོ་སྨད་ཁྲི་ཀའི་ཡུལ་དུ་སྐུ་འཁྲུངས་པའི་ཨ་ཀྱཱ་སྐུ་ཕྲེང་བཞིའི་མཚམས་སྦྱོར་མདོར་བསྡུས། 
རྩོམ་པ་པོ།  ཁྲི་སྐལ་བཟང་བརྩོན་འགྲུས།     སྤེལ་དུས།  2016-02-25 22:09:12    རྡེབ་ཚད།     ཡོང་ཁུངས། ངེད་དྲ་ཚིགས།

                      ༄༅།།མདོ་སྨད་ཁྲི་ཀའི་ཡུལ་དུ་སྐུ་འཁྲུངས་པའི་ཨ་ཀྱཱ་སྐུ་ཕྲེང་བཞིའི་
                                            མཚམས་སྦྱོར་མདོར་བསྡུས། 
                                                                   
           ཁྲི་སྐལ་བཟང་བརྩོན་འགྲུས། 

        1.jpg

                                  ཨ་ཀྱཱ་བློ་བཟང་འཇམ་དབྱངས་རྒྱ་མཚོ། 
   ཁྲི་ཀ་སྒོ་མེ་ཧོར་ཀྱཱ་སྡེ་བར་ཕྱི་ལོ1768 ལོར་འཁྲུངས།  ཨ་ཀྱཱ་སྐུ་ཕྲེང་གསུམ་པ་ཡིན། སྐུ་འབུམ་བྱམས་པ་གླིང་དུ་གདན་སར་བཀོད་དེ་ཆོས་སྒོར་ཞུགས། རིམ་བཞིན་དབུ་ཕར་གྱི་གཞུང་དང་ཐུན་མོང་གི་རིག་གནས་ལ་ཞིབ་པར་སྦྱངས། དགུང་ལོ་བཅོ་བརྒྱད་པ་ཕྱི་ལོ1785 ལོར་པེ་ཅིན་དུ་ཕེབས་ཏེ་མན་ཇི་གོང་མར་མཇལ་ཕྲད་གནང་། དབུས་སུ་ཕེབས་ཏེ་སེ་ར་ཐེག་ཆེན་གླིང་གི་བྱེས་གྲྭ་ཚང་དུ་མདོ་སྔགས་ཀུན་ལ་སློབ་གཉེར་མཛད། རྒྱལ་དབང་མཆོག་ནས་“བསྟན་པའི་གསལ་བྱེད་ཨེར་ཏི་ནི་པཎྜི་ཏ”འི་གཟེངས་བསྟོད་དང་མཁན་ཆས་བསྩལ།  དགུང་ལོ་བཞི་བཅུ་བར་སྐུ་འབུམ་བྱམས་པ་གླིང་གི་ཁྲི་ཆེན་བཞི་བཅུ་བར་བཞུགས་ཏེ་འཆད་ཉན་རྟིང་སྐུལ་མཛད་པས་དར་ཞིང་རྒྱས།  སྐུ་འབུམ་གསེར་སྡོང་དང་རྒྱུད་པ་འདུ་ཁང་ཞིག་གསོ་མཛད།  སོག་ཡུལ་དང་པེ་ཅིན་སོགས་སུ་ཡང་བསྟན་འགྲོའི་བྱ་བ་རྒྱ་ཆེར་མཛད།  ཕྱི་ལོ1816 ལོར་གཤེགས། 

                                 ཨ་ཀྱཱ་ཧོ་ཐོག་ཐུ་ཡེ་ཤེས་མཁས་གྲུབ་རྒྱ་མཚོ།
   ཁྲི་ཀའི་སྒོ་མེ་ཧོར་ཀྱཱ་སྡེ་བར་ཕྱི་ལོ1817ལོར་འཁྲུངས། ཨ་ཀྱཱ་སྐུ་ཕྲེང་བཞི་བ་ཡིན། སྐུ་འབུམ་བྱམས་པ་གླིང་དུ་ཚོགས་ཞུགས་གནང་སྟེ་ཕྱག་རྡོ་ཐང་ལ་ཀྱཱ་སྨོན་རམས་པ་བློ་བཟང་དོན་འགྲུབ་ཡོངས་འཛིན་དུ་བསྟན་ནས། མདོ་སྔགས་རིག་གནས་དང་བཅས་པ་ལ་ཐོས་བསམ་གྱིས་དུས་འདའ་བར་བྱས་ཏེ་བཤད་སྒྲུབ་ཀྱི་བསྟན་པ་འཛིན་སྐྱོང་བླ་མེད་མཛད།  པེ་ཅིན་དུ་མན་ཇི་གོང་མས་གདན་འདྲེན་ཞུས་ཏེ་བསྔགས་པའི་ཆོ་ལོ་བསྩལ།  སྐུ་འབུམ་གསེར་སྡོང་ཆེན་མོའི་རྒྱ་ཕིབས་གསར་བཞེངས་ཀྱི་བྱ་བ་ལེགས་པར་འགྲུབ། ཕྱི་ལོ1863ལོ་ནས་རྒྱ་སོག་གི་འཁྲུག་ཆེན་བསླངས་པར་བསླབ་པ་ཕུལ་ཏེ་དམག་འབྲེལ་སྲིད་སྐྱོང་གི་ལས་ཁུར་བསྣམས་ནས། སྐུ་འབུམ་དང་སྟོང་སྐོར། ཁྲི་ཀ་སོགས་ལ་བདག་སྐྱོང་མཛད་པའི་བཀའ་དྲིན་ཆེ། ཕྱི་ལོ1869 ལོར་གཤེགས། 

                                  ཨ་ཀྱཱ་བློ་བཟང་བསྟན་པའི་དབང་ཕྱུག་བསོད་ནམས་རྒྱ་མཚོ།
   ཁྲི་ཀ་སྒོ་མེ་ཧོར་ཀྱཱ་སྡེ་བར་ཕྱི་ལོ1870 ལོར་སྐུ་འཁྲུངས།  ཨ་ཀྱཱ་སྐུ་ཕྲེང་ལྔ་བ་ཡིན། སྐུ་འབུམ་བྱམས་པ་གླིང་དུ་ཡི་གེ་འབྲི་ཀློག་ནས་དབུ་བཟུང་སྟེ་བཀའ་པོད་ལྔའི་མཚོན་གཞུང་ལུགས་རྒྱ་མཚོ་ལྟ་བུར་ཐོས་བསམ་མཛད། མཁའ་འགྲོ་སྙན་རྒྱུད་ཀྱི་ཆུ་མིག་བརྒྱ་རྩར་ཕེབས་ཏེ་མཐར་ཐོན་མཛད། སྔ་ཕྱིར་སོག་ཡུལ་དང་པེ་ཅིན་གོང་མའི་མདུན་དུ་ལན་ཁ་ཤས་ཕེབས་ཏེ་བསྟན་འགྲོའི་དོན་རྒྱ་ཆེར་མཛད། ཕྱི་ལོ1909 ལོར་གཤེགས། 

                                 ཨ་ཀྱཱ་བློ་བཟང་བསྟན་པའི་རྒྱལ་མཚན།
  མདོ་སྨད་ཁྲི་ཀའི་སྟག་ལུང་གྲོང་སྡེར་ཕྱི་ལོ1910 ལོར་འཁྲུངས། ཨ་ཀྱཱ་སྐུ་ཕྲེང་དྲུག་པ་ཡིན། དགུང་ལོ་བདུན་པར་རབ་ཏུ་བྱུང་སྟེ་ཉེར་གཅིག་བར་ཆོས་སྤྱོད་དང་བཀའ་པོད་ལྔའི་རྩ་བ་སོགས་བློར་འཛིན་དང་། བོད་ཡིག་གཟབ་གཤར་དང་སོག་ཡིག   སྒྲ་སྙན་ངག  དབུ་ཕར་བར་གྱི་དཔེ་ཁྲིད། དབང་ལུང་མན་ངག་སོགས་མཐའ་ཡས་པ་གསན། ཉེར་གཅིག་ནས་སྐུ་འབུམ་བཤད་སྒྲུབ་གླིང་གི་ཆོས་གྲྭར་ཞུགས་ཏེ་གཞུང་ཆེན་བཀའ་པོད་ལྔ་ལ་ཐོས་བསམ་རྒྱ་ཆེར་མཛད། བསྡུས་གྲྭ་དང་བཀའ་པོད་ལྔའི་དམ་བཅའ་སྔ་ཕྱིར་བཞག་སྟེ་བསྔགས་བརྗོད་ཀྱི་མེ་ཏོག་དང་མཁས་པའི་སྙན་གྲགས་ཕྱོགས་སུ་རྒྱས། སྔ་ཕྱིར་ཨ་ལགས་བླ་ཁོ་རིན་པོ་ཆེ་དང་སྐྱབས་རྗེ་ཤིང་བཟའ་ཚང་སོགས་ཀྱི་མདུན་ནས་དབང་ལུང་ཁྲིད་མཐའ་ཡས་པ་གསན། དགུང་ལོ་བཞི་བཅུ་པར་སྐུ་འབུམ་བྱམས་པ་གླིང་གི་ཁྲི་ཆེན་གོ་གསུམ་པར་བཞུགས་ཏེ་རྗེ་སྒོ་གཉིས་ཀྱི་ཡིག་ཆའི་རྩོད་ཡིག་དང་བརྩི་བཞག རྩོད་རྒྱུགས་དང་བློ་རྒྱུགས། གཞོན་པ་རྣམས་ལ་དཔེ་ཁྲིད་དང་སྐྱོར་སྦྱོང་སོགས་འཆད་ཉན་ལ་ནན་ཏན་གྱིས་རྟིང་སྐུལ་ཤུགས་ཆེར་མཛད། འདོན་རྟ་དབྱངས་དང་ཐིག་རྡུལ་ཚོན། པར་རྐོ་ལ་སོགས་ལ་ཡང་ནན་ཏན་མཛད་པས་ཆོས་སྲིད་ཀྱི་ལེགས་ཚོགས་ཀུན་དར་ཞིང་རྒྱས་བའི་བཀའ་དྲིན་བླ་མེད་མཛད། དགེ་ཚུལ་སློང་དང་བསྙེན་རྫོགས་ཀྱི་སྡོམ་པ། དབང་ལུང་མན་ངག་གི་གསུང་ཆོས་སོགས་སྐབས་སྐབས་སུ་གདུལ་བྱའི་ཁྱོན་ལ་མང་དུ་བསྩལ། དུས་འཁོར་གྱི་རྡུལ་ཚོན་ལ་བརྟེན་པའི་ཆོ་ག་གསར་འཛུགས་སོགས་བསྟན་འགྲོའི་དོན་རྒྱ་ཆེར་མཛད་པས་བཤད་སྒྲུབ་དབྱར་མཚོ་བཞིན་རྒྱས།  གསུང་རྩོམ་པོད་གཉིས་ཙམ་བཞུགས། དགུང་ལོ་སོ་དགུ་བ་ཕྱི་ལོ1948 ལོར་དགོངས་པ་ཆོས་དབྱིངས་སུ་འཐིམ་པའི་ཚུལ་བསྟན།

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།