༄༅། །བོད་ཀྱི་གནའ་རབས་སློབ་གསོའི་ཁྱད་ཆོས།
རྩོམ་པ་པོ།  དུང་དཀར་བློ་བཟང་འཕྲིན་ལས།     སྤེལ་དུས།  2015-02-04 18:33:05    རྡེབ་ཚད།     ཡོང་ཁུངས། ངེད་དྲ་ཚིགས།

བོད་ཀྱི་གནའ་རབས་སློབ་གསོའི་རིག་པར་ཁྱད་ཆོས་གང་དང་གང་ཡོད་རགས་བསྡུས་ཙམ་ཞིག་ངོ་སྤྲོད་བྱས་ན་འདི་ལྟར་མཆིས་ཏེ།

གཅིག སློབ་གསོའི་ལམ་ལུགས།

     སློབ་གསོའི་ལམ་ལུགས་ཞེས་པ་ནི་སློབ་གྲྭ་གང་འདྲ་ཞིག་ཡིན་ཀྱང་དེའི་ངོ་བོ་དང་། ལས་འགན། སློབ་གྲྭ་ཞུགས་སྐབས་དགོས་པའི་ཆ་རྐྱེན་། སློབ་སྦྱོང་གི་ཡུན་ཚན། རྒྱུགས་ལེན། སློབ་གྲྭ་ཐོན་སྐབས་ཀྱི་ཆུ་ཚད་སོགས་ཀྱི་ལམ་ལུགས་ཡོད་པ་ལ་ཟེར། དེ་ཡང་སྤྱི་ཚོགས་ཀྱི་ལམ་ལུགས་མི་འདྲ་བར་གཞིགས་པའི་སློབ་གསོའི་དམིགས་ཚད་དང་ལས་འགན་སོགས་མི་འདྲ་བ་ཡོད་པ་དང་། བོད་ཞི་བའི་བཅིངས་འགྲོལ་མ་ཐོབ་གོང་སྟེ་དེ་སྔའི་བོད་ཀྱི་སློབ་གསོའི་ལམ་ལུགས་ཐད་གསོ་སྐྱོང་བྱེད་པའི་དམིགས་ཚད་དང་ལས་འགན་མི་འདྲ་བ་ཡིན་སྟབས་སློབ་གྲྭའི་ངོ་བོ་མི་འདྲ་བ་ཡོད། དཔེར་ན། དུས་རབས་བརྒྱད་པའི་དཀྱིལ་དུ་བཙན་པོ་ཁྲི་སྲོང་ལྡེ་བཙན་གྱིས་བསམ་ཡས་གཙུག་ལག་ཁང་དུ་ཐོག་མར་བཙུགས་པའི་ཆོས་ཀྱི་སློབ་གྲྭ་ནི་ཆོས་ལུགས་སློབ་སྦྱོང་བྱེད་རྒྱུ་ཡིན་ཅིང་། ནང་དོན་ནི་སངས་རྒྱས་ཀྱི་ཐུན་མོང་མ་ཡིན་པའི་ཁྱད་ཆོས་སྐྱབས་འགྲོ་དང་། ལས་རྒྱུ་འབྲས། སངས་རྒྱས་ཆོས་ལུགས་ཀྱི་ཆོས་ཁྲིམས་བཅས་སློབ་རྒྱུ་ཡིན། སློབ་མ་དེ་དག་གི་ནང་ནས་ཆོས་གང་མཁས་པ། སྤྱོད་ཚུལ་གང་བཟང་བ་རྣམས་བཅོམ་ལྡན་འདས་ཀྱི་རིང་ལུགས་པར་༼མཁན་པོ་དང་སློབ་དཔོན༽བསྐོ་བཞག་བྱེད་ཀྱི་ཡོད་པ་དང་། སྐབས་དེར་སློབ་དཔོན་བཅུ་གསུམ་དང་། སློབ་མ་ཉི་ཤུ་རྩ་གསུམ་ཡོད་པ་དེ་དག་གི་འཚོ་བའི་འགྲོ་གྲོན་ནི་རྒྱལ་པོའི་མཛོད་ནས་སྦྱར་སྟེ་སློབ་དཔོན་རེར་ལོ་རེར་ཕོགས་འབྲུ་ཁལ་ལྔ་བཅུ་ང་ལྔ།༼ཟླ་རེར་ཁལ་བཞི་དང་བྲེ་བཅུ་གཉིས་ཕུལ་གང་༽མར་སྲང་བརྒྱད་བཅུ།༼ཟླ་རེར་མར་ཉག་དྲུག་དང་སྲང་དོ༽ན་བཟའ་ཆ་ཚང་རེ། སློབ་མ་མི་གྲངས་ཉི་ཤུ་རྩ་ལྔ་ཡིན་པར་སློབ་མ་རེ་ལ་ལོ་རེ་ཕོགས་ནས་ཁལ་ཉི་ཤུ་རྩ་ལྔ་རེ།༼ཟླ་རེར་འབྲུ་ཁལ་གཉིས་ལྷག་ཙམ༽སྣམ་བུ་བུབས་གསུམ་རེ་བཅས་རྒྱུན་སུ་སྤྲོད་ཀྱི་ཡོད་པ་དང་། སློབ་མ་དེ་དག་གི་ནང་ནས་ཆོས་མཁས་ཤོས་དང་ཀུན་སྤྱོད་བཟང་བ་རྣམས་བཅོམ་ལྡན་འདས་ཀྱི་རིང་ལུགས་པ་སྟེ་མཁན་པོར་བསྐོ་བཞག་བྱས་ཐོག་ལོ་རེར་ཕོགས་འབྲུ་ཁལ་བདུན་ཅུ་དོན་ལྔ༼ཟླ་བ་རེར་འབྲུ་ཁལ་དྲུག་དང་བྲེ་ལྔ༽མར་སྲང་ཆིག་སྟོང་བརྒྱ་ཐམ་པ༼ཟླ་བ་རེར་མར་ཁལ་གཅིག་དང་ཉག་གསུམ་ལྷག་ཙམ༽ན་བཟའ་སྣམ་བུ་བུམས་དགུ། ཆིབས་རྟ་གཅིག ཤོག་བུ་བཅུ་ལྡེབས་བཞི། སྣག་ཚ་ཡུག་གསུམ། ཚྭ་ནམ་དགོས་དུས་སུ་ལེན་ཆོག་པ་བཅས་ཀྱི་ལྟ་སྐྱོང་ཡོད་པ་དང་། གོ་གནས་ནི་གསེར་ཡིག་ཆུང་བའི་བྱང་བུ་དང་། ཚོགས་འདུའི་སྐབས་དགུང་བློན་ཆེན་པོའི་འོག་ཞང་བློན་ཆེན་པོའི་གྲལ་གྱི་གོང་དུ་བསྡད་ཆོག་པ་བཅས་ཀྱི་གུས་བཀུར་མཐོང་ཆེན་གནང་གི་ཡོད་ཚུལ༼རྦ་བཞེད༽ནང་དུ་གསལ།

      སངས་རྒྱས་ཆོས་ལུགས་ཕྱི་དར་འགོ་ཚུགས་པ་ནས་བོད་ཞི་བའི་བཅིངས་འགྲོལ་མ་ཐོབ་བར་དུ་ཆོས་ལུགས་དང་རིག་གནས་སློབ་གསོ་བྱེད་པའི་ལྟེ་གནས་ནི་དགོན་པ་ཁག་ཡིན་ཞིང་། དེ་ལ་ཡང་ནང་གསེས་ཕྱེ་ན་རིགས་གསུམ་ཡོད། རིགས་དང་པོ་ནི་ཆོས་ལུགས་སློབ་སྦྱོང་གཙོ་བོར་བྱས་ཏེ་མཐར་ཐོན་རྗེས་རང་མོས་ཀྱི་ཐོག་ནས་རིག་གནས་གཞན་དག་སློབ་སྦྱོང་བྱེད་པ་མ་གཏོགས་ཆོས་ལུགས་སློབ་སྦྱོང་བྱེད་པའི་རིང་དེར་རིག་གནས་གཞན་དག་སློབ་སྦྱོང་བྱེད་མི་ཆོག་པའི་ལམ་སྲོལ་དམ་པོ་ཡོད་པ་ཞིག་སྟེ་དེ་ནི་དབུས་གཙང་གདན་ས་ཆེན་པོ་བཞི་སོགས་མཚན་ཉིད་ཀྱི་གྲྭ་ས་ཕལ་ཆེ་བ་དེ་ལྟར་ཡིན། དེའི་རྒྱུ་མཚན་ནི་སློབ་སྦྱོང་གི་སྐབས་གཙོ་གནད་ཡོད་པའི་སྒོ་ནས་སྣ་གཅིག་ལ་དམ་འཛིན་མ་བྱས་པར་སྣ་མང་པོར་བཟུང་ན་ཤེས་རིག་འཆལ་ཏེ་སེམས་པ་ལྷོད་གཡེང་དུ་འགྲོ་བ་དང་སྣ་མང་བསླབས་ཀྱང་ལེགས་པར་ཤེས་པ་སྣ་གཅིག་ཀྱང་སྟོན་རྒྱུ་མེད་པར་འབད་བརྩོན་བྱས་པ་ཐམས་ཅད་དོན་མེད་དུ་འགྲོ་བ་སྔོན་འགོག་བྱེད་ཆེད་དམིགས་ཡུལ་ཡོངས་རྫོགས་ལ་དམིགས་ཐོག་གོམ་པ་རེ་རེ་བྱས་ནས་མཐར་ཐོན་ཡོང་པའི་བྱ་ཐབས་བཟུང་བ་ཞིག་ཡིན་པ་མ་གཏོགས་ཆོས་ལུགས་སློབ་སྦྱོང་བྱེད་མཁན་གྱིས་རིག་གནས་གཞན་དག་གཏན་ནས་སློབ་མི་ཆོག་པ་མིན་ལ། གདན་ས་ཆེན་པོའི་ནང་དུ་དགེ་བཤེས་མིང་བཏགས་ཐོན་རྗེས་རིག་གནས་གཞན་དག་སློབ་སྦྱོང་གནང་རྒྱུར་བཀག་འགོག་གཏན་ནས་མེད། རིགས་གཉིས་པ་ནི་ཆོས་ལུགས་སློབ་སྦྱོང་གཙོ་བོར་བྱེད་པའི་ཞོར་ལ་ཆོས་མཚམས་ཀྱི་ངལ་གསོ་གོ་སྐབས་དང་བསྟུན་ནས་རིག་གནས་གཞན་སློབ་སྦྱོང་བྱེད་པ་དེ་ཡིན་ཅིང་། གྲུབ་མཐའ་རིས་མེད་ཀྱི་མཁས་དབང་མང་པོ་ཞིག་ནི་སློབ་གཉེར་གནང་ཐབས་དེ་ལ་བརྟེན་ནས་མདོ་སྔགས་རིག་གནས་དང་བཅས་པ་དུས་ཐུང་ལོ་བཅུ་ཡས་མས་ལ་སློབ་གཉེར་མཐར་སོན་ཏེ་འཆད་རྩོད་རྩོམ་གསུམ་ཀའི་ཐོག་ནས་མིང་དོན་མཚུངས་པའི་མཁས་དབང་ཆེན་པོར་གྱུར་པ་ཤ་སྟག་ཡིན། རིགས་གསུམ་པ་ནི་དགོན་པ་དེའི་ནང་དུ་གཞུང་ཆེན་པོ་ལྔར་སློབ་སྦྱོང་གཙོ་བོར་བྱེད་མཁན་གྱི་གྲྭ་ཚང་སྔོན་ཡོད་ཐོག་བོད་སྨན་རྩིས་གཉིས་ལ་གཙོ་བོར་སློབ་སྦྱོང་བྱེད་པའི་ཆེད་ལས་གྲྭ་ཚང་ཟུར་དུ་ཕྱེ་སྟེ་གཞུང་ཆེན་པོ་སློབ་གཉེར་བྱེད་མི་ཐུབ་པའི་གྲྭ་པ་ཁག་གཅིག་སྨན་རྩིས་གཉིས་དང་རིག་གནས་གཞན་དག་སློབ་སྦྱོང་བྱེད་དུ་འཇུག་པ་དེ་ཡིན། དེ་ནི་བོད་ཀྱི་སློབ་གསོའི་ཐོག་གི་བསྒྱུར་བཅོས་ཆེན་པོ་ཞིག་དང་འཕེལ་རྒྱས་གསར་པ་ཞིག་སྟེ་ལམ་སྲོལ་དེ་ཐོག་མར་འཛུགས་པ་གནང་མཁན་ནི་འཇམ་དབྱངས་བཞད་པ་སྐུ་ཕྲེང་གཉིས་པ་འཇིགས་མེད་དབང་པོ་ཡིན་ཅིང་། ཁོང་གིས་མདོ་སྨད་ཕྱོགས་སུ་བོད་ཀྱི་སྐར་རྩིས་རིག་པའི་སྲོལ་རྒྱུན་སྔར་ཡོད་མི་ཉམས་ཆེད་རབ་བྱུང་བཅུ་གསུམ་པའི་ཆུ་ལུག་ལོར་༼སྤྱི་ལོ་1763༽རྒྱུད་སྟོད་སྔགས་རམས་པ་བློ་བཟང་རྡོ་རྗེ་དང་བཀྲ་ཤིས་འཁྱིལ་གྱི་དགེ་བཤེས་རབ་བརྟན་རྒྱ་མཚོ་གཉིས་སློབ་དཔོན་དུ་བསྐོས་ཏེ་མཚན་ཉིད་གྲྭ་ཚང་དང་རྒྱུད་པ་གྲྭ་ཚང་གཉིས་ཀྱི་གྲྭ་པ་ཁག་གཅིག་བསྡུས་ནས་གདན་ས་བཀྲ་ཤིས་འཁྱིལ་རང་དུ་དུས་འཁོར་གྲྭ་ཚང་ཨེ་ཝམ་ཆོས་འཁོར་གླིང་ཟུར་དུ་འཛུགས་གནང་ཐོག་གྲྭ་ཚང་དེར་གཙོ་བོར་བོད་ཀྱི་སྐར་རྩིས་རིག་པ་སློབ་སྦྱོང་དང་། ཞོར་ལ་སྒྲ་རིག་པ་དང་། སྡེབ་སྦྱོར། སུམ་རྟགས། སྙན་ངག གཞན་ཡང་ཆོས་ལུགས་ཀྱི་བྱེད་སྒོ་ཁག་གཅིག་བཅས་སློབ་སྦྱོང་བྱེད་དགོས་པའི་གཏན་འབེབས་གནང་བའི་སྐར་རྩིས་ཀྱི་ཆེད་ལས་སློབ་གྲྭ་ཞིག་བྱུང་བ་དང་དུས་མཚུངས་རིག་གནས་གཞན་དག་གི་ཞོར་སྦྱོང་སློབ་གྲྭའི་རྨང་གཞི་ཡང་འདིང་ཐུབ་པ་བྱུང་། དེ་རྗེས་སྡེ་དགེ་ཕྱོགས་སུ་གནས་ལྔ་རིག་པའི་པཎྜིཏ་འཇམ་དབྱངས་མཁྱེན་བརྩེ་མཆོག་ནས་ཀ་ཐོག་གདན་སར་གཞུང་ཆེན་བཅུ་གསུམ་དང་རིག་གནས་ཆུང་བ་ལྔའི་སློབ་གྲྭ་ཆེད་འཛུགས་གནང་ཡོད་པ་གོ་ཐོས་བྱུང་ཡང་ལོ་རྒྱུས་ཞིབ་ཆ་བདག་གིས་མ་མཐོང་། གོང་གསལ་དགོན་པ་ཆེན་པོའི་ནང་དུ་རིག་གནས་སློབ་སྦྱོང་གི་ཆེད་ལས་གྲྭ་ཚང་ཟུར་དུ་བཙུགས་པ་དེས་རིག་གནས་སློབ་སྦྱོང་བྱེད་འདོད་པའི་བློ་གསལ་དོན་གཉེར་ཅན་རྣམས་ལ་ཆ་རྐྱེན་བཟང་པོ་ཞིག་བསྐྲུན་པ་མ་ཟད། ཕུན་སུམ་ཚོགས་པའི་བོད་ཀྱི་རིག་གནས་རྒྱུད་འཛིན་དང་གོང་འཕེལ་གཏོང་བའི་གནས་གཞི་བརྟན་པོ་འཛུགས་ཐུབ་པ་བྱུང་པ་རེད།

གཉིས། སློབ་གསོའི་མཚན་ཉིད་རིག་པ།

      དེ་ནི་བསམ་བློའི་སློབ་གསོ་དང་། ཤེས་ཡོན་གྱི་སློབ་གསོ། སྒྲིག་ཁྲིམས་ཀྱི་སློབ་གསོ་བཅས་ཕྱོགས་གསུམ་དང་འབྲེལ་བ་ཞིག་ཡིན། བསམ་བློ་ཀུན་སྤྱོད་ལེགས་པ་ནི་རང་ཤུགས་སུ་མི་ཡོང་བས་ཐོག་མར་སྒྲིག་ཁྲིམས་ལ་བརྟེན་ནས་རང་ཉིད་གཅུན་དགོས་པ་དང་། སྒྲིག་ཁྲིམས་ནི་བཙན་ཤེད་དང་གཞན་དབང་གི་རང་བཞིན་ལྡན་པ་ཞིག་ཡིན་པས་དེས་རང་ཉིད་གཅུན་ཏེ་གོམས་གཤིས་སུ་འཇགས་པ་ཞིག་བྱུང་མཚམས་གཞི་ནས་རང་རྟོགས་ཡོད་པའི་བསམ་བློ་ཀུན་སྤྱོད་བཟང་པོ་དེ་བྱུང་ཞིང་། དེ་གཉིས་མེད་ན་ཤེས་ཡོན་ལེགས་པོ་ཐོབ་མི་ཐུབ་མ་ཟད། གལ་སྲིད་ཤེས་ཡོན་ཕྲན་བུ་ཞིག་ཐོབ་པའི་དབང་དུ་བྱས་ཀྱང་། དེས་རང་གཞན་ཚང་མར་གནོད་པ་ཞིག་ལས་ཕན་པ་གང་ཡང་མི་ཡོང་། སྒྲིག་ཁྲིམས་རང་རྟོགས་ཀྱིས་སྲུང་བ་དང་ཀུན་སྤྱོད་ལེགས་པོ་ཞིག་ཡོད་ན་ཤེས་ཡོན་ཡང་གོང་ནས་གོང་དུ་འགྲོ་བས། དེ་གསུམ་ཕན་ཚུན་གཅིག་ཕན་གཅིག་གྲོགས་སུ་གནས་པ་ཡིན་ཞེས་བོད་ཀྱི་མཁས་པ་སྔ་མ་ཚོའི་གསུང་རྒྱུན་དུ་ཡོད།

གསུམ། སློབ་ཁྲིད།

      སློབ་ཁྲིད་ཅེས་པ་ནི་དགེ་རྒན་གྱིས་སློབ་ཚན་ཁྲིད་པ་དང་སློབ་མས་སློབ་ཚན་ཉན་པའི་ཐུན་མོང་གི་འགུལ་སྐྱོད་ཅིག་སྟེ། སློབ་སྦྱོང་བྱེད་པ་བརྒྱུད་ནས་ཤེས་ཡོན་ཤེས་པ་དང་ངེས་འཛིན་བྱེད་པའི་ནུས་རྩལ་མཐོ་རུ་གཏོང་རྒྱུ་དང་ཆབས་ཅིག ཁོ་ཚོའི་བསམ་བློ་དང་ཀུན་སྤྱོད་ལེགས་པོ་གསོ་སྐྱོང་བྱེད་པ་ཞིག་ལ་ཟེར། དེ་ལ་ནང་གསེས་ཀྱིས་ཕྱེ་ན། བཤད་ཁྲིད་དང་དམར་ཁྲིད། མྱོང་ཁྲིད་བཅས་རིགས་གསུམ་ཡོད།

1 བཤད་ཁྲིད་ཟེར་བ་ནི་སློབ་དཔོན་གྱིས་སློབ་མར་བསླབ་བྱའི་གཞུང་དེའི་ཚིག་དང་དོན་རྣམས་ཡིག་འབྲུ་གཅིག་ཀྱང་མ་ལུས་པར་གསལ་བཤད་བྱས་པ་ལ་ཟེར།

2 དམར་ཁྲིད་ཟེར་བ་ནི་དངོས་ཡོད་ཀྱི་དཔེ་མཚོན་ནམ་ཡང་ན་རི་མོར་བྲིས་པ་ལྟ་བུའི་སྟེང་ནས་གསལ་བཤད་བྱས་པ་སྟེ། དེང་སང་གཟུགས་སྣང་ཅན་གྱི་སློབ་ཁྲིད་ཟེར་བ་དེ་ཡིན།

3 མྱོང་ཁྲིད་ཟེར་བ་ནི་སློབ་དཔོན་གྱིས་རང་ཉིད་ཀྱི་ཉམས་མྱོང་ཐོག་ནས་སློབ་མར་སློབ་ཁྲིད་བྱས་ཏེ་སློབ་མ་ལ་ཉམས་མྱོང་དངོས་སུ་མ་ཐོན་བར་དུ་བསམ་བློ་གཏོང་དུ་བཅུག་པ་དེ་ལ་ཟེར། ཁྲིད་སྟངས་རིགས་གསུམ་པོ་དེ་ཡང་ཕན་ཚུན་འབྲེལ་བ་ཡོད་པ་ཞིག་ཡིན་པ་མ་ཟད། སློབ་མའི་ཆུ་ཚད་མཐོ་དམན་གྱི་ཁྱད་པར་གཞིར་བཟུང་ནས་ཁྲིད་སྟངས་རིགས་གསུམ་ཀའམ། ཡང་ན་དེ་གསུམ་གྱི་ནང་ནས་གང་ལ་གང་གཙོ་བོར་བྱ་དགོས་པ་སློབ་མའི་གནས་ཚད་ལ་བསྟུན་པ་དང་། སློབ་མ་ཤེས་ཚད་དམའ་པ་རྣམས་ལ་དམར་ཁྲིད་དང་མྱོང་ཁྲིད་ཐོག་ནས་གོ་སླ་ཞིང་དོན་བསྡུས་པའི་སློབ་ཁྲིད་གནང་སྲོལ་ཡོད་པ་རེད།

བཞི། སློབ་ཁྲིད་ཀྱི་རྩ་འཛིན།

      སློབ་ཁྲིད་ཀྱི་རྩ་འཛིན་ཞེས་པ་ནི་སློབ་ཁྲིད་ཀྱི་འཆར་གཞི་གཞིར་བཟུང་ནས་སློབ་ཚན་རྒྱས་བསྡུས་འབྲིང་གསུམ་གྱི་ཁྲིད་ཚུལ་གཏན་འཁེལ་ཡོད་པ་ཞིག་སྟེ། དེའི་ནང་ལས་འགན་དང་། དངོས་སྦྱོང་། ཚོད་ལྟ། བསྐྱར་སྦྱོང་སློབ་ཁྲིད་ཀྱི་དུས་ཚོད་ཆ་བགོས་བྱས་པའི་རྩ་འཛིན་ཡོད་པ་ལ་ཟེར།

      དེ་སྔོན་གདན་ས་ཆེན་པོ་ཁག་ལ། སངས་རྒྱས་ཆོས་ལུགས་ཀྱི་མཚན་ཉིད་རིག་པ་སློབ་ཁྲིད་གནང་སྐབས་ཀྱི་གོ་རིམ་དང་རྒྱས་བསྡུས་ཀྱི་རྩ་འཛིན་ནི། ཐོག་མར་རིགས་པའི་གཞུང་ལུགས་དང་མཚན་ཉིད་རིག་པའི་འགྲོ་ལུགས་ཤེས་པའི་ཆེད་དུ་བསྡུས་གྲྭ། དེ་རྗེས་བློ་རིགས་ཏེ་དབང་པོ་ལྔ་དང་། དབང་ཤེས་ལྔ་སོགས་མངོན་སུམ་དང་། གཏན་ཚིགས་རིག་པ་ལ་བརྟེན་ནས་ཕྱི་རོལ་ཡུལ་ངོས་འཛིན་བྱེད་པའི་རྗེས་དཔག་གི་ཤེས་རིག་བཅས་སྐྱེད་ཚུལ་དང་། མངོན་སུམ་དང་རྗེས་དཔག་བར་གྱི་འབྲེལ་བ། འཁྲུལ་ཤེས་ཏེ་ནོར་འཁྲུལ་ཅན་གྱི་ཤེས་པ་དང་། ལོག་ཤེས་ཏེ་བསམ་བློ་ཡང་མ་དག་པའི་རིགས། དད་པ་བརྩོན་འགྲུས་སོགས་སེམས་པ་བཟང་པོའི་རིགས། འདོད་ཆགས་དང་ཞེ་སྡང་སོགས་བསམ་པ་ངན་པའི་རིགས། འགྱོད་པ་དང་གཉིད་སོགས་གཞན་འགྱུར་གྱི་རིགས། གཞན་ཡང་དེ་དག་དང་འབྲེལ་ཡོད་ཀྱི་བསམ་བློ་རིགས་མི་འདྲ་བ་སོ་སོའི་ཁྱད་ཆོས་དང་འབྲེལ་བ་བཅས་ཤེས་པའི་ཆེད་དུ་བློ་རིགས། གཏན་ཚིགས་རིགས་པ་ཡང་དག་པ་གསུམ་དང་། ཡང་མ་དག་པ་བཞི་བཅས་སོ་སོའི་ཁྱད་ཆོས་དང་འབྲེལ་བ། ནང་གསེས་ཀྱི་དབྱེ་བ། གཏན་ཚིགས་རིགས་པ་ཁག་དང་བསམ་བློ་རིགས་མི་འདྲ་བ་ཁག་བར་འབྲེལ་བ་གང་ཡོད་པ་བཅས་ཤེས་པའི་ཆེད་དུ་རྟགས་རིགས་ཏེ་གཏན་ཚིགས་རིགས་པ། དེ་ཡི་རྨང་གཞིའི་ཐོག་རྒྱ་གར་དུ་ཡོད་པའི་གནའ་རབས་ཀྱི་ཆོས་ལུགས་ཏེ་མུ་སྟེགས་པའི་ལྟ་བ་རིགས་བཅུ་གཅིག་སོ་སོའི་ལྟ་ཚུལ་དང་ནང་པ་སངས་རྒྱས་པའི་ལྟ་བ་ཁག་གི་བར་གྱི་ཁྱད་པར་དང་། འགལ་བ། འཐབ་རྩོད་བཅས་ཀྱི་གནས་ཚུལ་ཤེས་པའི་ཆེད་དུ་ཚད་མ་རིག་པ་སྟེ་ཚད་མ་རྣམ་འགྲེལ། དེ་རྗེས་ནང་པ་སངས་རྒྱས་པའི་ཐེག་པ་ཆེན་པོའི་སྤྱོད་ཚུལ་ཤེས་པའི་ཆེད་དུ་ཕར་ཕྱིན། དེ་རྗེས་ནང་པ་སངས་རྒྱས་པའི་ཐེག་པ་ཆེན་པོའི་ལྟ་བ་ཤེས་པའི་ཆེད་དུ་དབུ་མ། དེ་རྗེས་ཐེག་པ་ཆུང་ངུའི་སྤྱོད་པ་དང་ལྟ་བ་ཤེས་པའི་ཆེད་དུ་མངོན་པ་མཛོད། དེ་རྗེས་ཐེག་པ་ཆེ་ཆུང་གཉིས་ཀའི་ཐུན་མོང་གི་སྤྱོད་པ་ཤེས་པའི་ཆེད་དུ་འདུལ་བ་བཅས་གོ་རིམ་བཞིན་དུ་སློབ་དགོས་པ་མ་ཟད། དེ་རྣམས་སོ་སོ་ལའང་སློབ་སྦྱོང་བྱས་པའི་ལོ་ཚད་དང་། ལོ་རེར་སློབ་སྦྱོང་གི་མཚམས་གང་ནས་གང་གི་བར་དུ་སླེབས་དགོས་པའི་ཚད་གཞི་བཅས་གཏན་འབེབས་ཡོད་པ་རེད། གཞུང་ཆེན་པོ་ལྔའི་སློབ་སྦྱོང་གི་ལོ་ཚད་སྐོར་གཤམ་དུ་སློབ་སྦྱོང་གི་ཡུན་ཚད་དང་ལོ་རེའི་སློབ་དུས་སྐོར་གླེང་སྐབས་སུ་བཀོད་ཡོད།

ལྔ། སློབ་ཁྲིད་ཀྱི་འཆར་གཞི།

      སློབ་ཁྲིད་ཀྱི་འཆར་གཞི་ཞེས་པ་ནི་སློབ་ཁྲིད་ཀྱི་གོ་རིམ་དང་དུས་ཚོད་སོགས་འཁོད་པའི་ཡིག་ཆ་ཞིག་སྟེ་སློབ་གྲྭ་དང་ཆེད་ལས་ཀྱི་ངོ་བོ་ལྡན་པའི་ལས་འགན་ཁག སློབ་མའི་ལོ་ཚད་ཁྱད་ཆོས། སློབ་ཚན་ཁག་གི་སློབ་ཁྲིད་དུས་ཚོད། རྒྱུགས་ལེན། སློབ་གྲྭ་ཐོན་པའི་ཡིག་ཚད་སོགས་སློབ་གྲྭ་དེའི་བྱ་རིམ་ཆ་ཚང་བ་རྣམས་དུས་དང་ཁག་བགོས་ནས་གཏན་འཁེལ་བྱས་པ་དེ་ཡིན། འཆར་གཞི་དེ་ནི་སློབ་གྲྭའི་འགོ་ཁྲིད་ལས་ཁུངས་ལ་དགོས་པ་མ་ཟད། དགེ་རྒན་སོ་སོར་ཡང་སློབ་དུས་རེ་དང་། ལོ་རེ་སློབ་གྲྭ་འགོ་ཚུགས་ནས་མ་ཐོན་བར་བཅས་དུས་ཐུང་དང་དུས་རིང་གི་སློབ་ཁྲིད་འཆར་གཞི་ཡོད་དགོས་ཤིང་། འཆར་གཞི་མེད་པར་སློབ་ཁྲིད་བྱས་ན་སློབ་དུས་གཅིག་ལ་སློབ་ཁྲིད་ཟིན་དགོས་པ་རྣམས་ཀྱང་མ་གྲུབ་པར་ལྷག་མ་ལུས་པའམ།ཡང་ན་གལ་ཆེའི་སློབ་ཚན་ཞིག་ཀྱང་དུས་ཚོད་ཐུང་ངུ་ཞིག་ལ་སློབ་ཁྲིད་ཟིན་པ་བྱས་ཏེ་སློབ་ཁྲིད་ཀྱི་སྤུད་ཚད་མ་ལོན་པའི་ཁྲལ་སེལ་སླ་བཅོས་ཡོང་ཉེན་ཆེན་པོ་ཡོད། དེ་སྔོན་གདན་ས་ཆེན་པོ་ཁག་དང་གཞུང་བཙུགས་དང་སྒེར་བཙུགས་ཀྱི་སློབ་གྲྭ་རྙིང་པ་ཁག་ལ་སློབ་ཁྲིད་ཀྱི་འཆར་གཞི་རགས་བསྡུས་ཙམ་ལས་ཞིབ་ཕྲ་མེད་པ་མ་ཟད། དགེ་རྒན་རྣམས་པ་ཚོས་ཀྱང་རང་རང་གི་མཁྱེན་རྒྱ་ཆེ་ཆུང་ལ་གཞིགས་པའི་སློབ་ཁྲིད་རྒྱས་བསྡུས་ཐུགས་འདོད་ལྟར་གནང་བ་མ་གཏོགས་ཡིག་ཆའི་ཐོག་གཅིག་གྱུར་གྱིས་གཏན་འཁེལ་བྱས་པའི་འཆར་གཞི་གཏན་ནས་མེད་སྟབས་དགེ་རྒན་མཁྱེན་ཡོན་ཧ་ཅང་རྒྱས་པ་ཚོས་སློབ་ཚན་སྣ་གཅིག་ལ་དུས་ཚོད་ཧ་ཅང་རིང་པོ་འགོར་འགྲོ་ཞིང་། དགེ་རྒན་མཁྱེན་རྒྱ་ཆུང་བ་ཚོས་སློབ་ཚན་གལ་ཆེའི་རིགས་ཀྱང་དུས་ཚོད་ཐུང་ཐུང་ཞིག་ནང་གྲུབ་པ་མཛད་དེ་སློབ་ཁྲིད་གནད་ལ་འཁེལ་པོ་ཞིག་ཡོང་གི་མེད་པ་རེད། དེ་ནི་གནའ་རབས་བོད་ཀྱི་སློབ་གསོའི་ལམ་ལུགས་ཐོག་མ་འདང་བའི་སྐྱོན་ཆ་ཞིག་ཡིན་པས་དེང་དུས་དང་མཐུན་པར་འཆར་གཞི་ལྡན་པའི་སློབ་ཁྲིད་ལམ་ལུགས་གཅིག་གྱུར་ཞིག་འཛུགས་དགོས་པ་རེད།

དྲུག སློབ་ཁྲིད་ཟིན་བྲིས།

      དེ་ནི་སློབ་ཁྲིད་ཀྱི་རྩ་འཛིན་གཞིར་བཟུང་ནས་དགེ་རྒན་སོ་སོས་བྲིས་པའི་སློབ་ཁྲིད་ཟིན་བྲིས་ཞིག་སྟེ་དེ་སྔོན་གདན་ས་ཆེན་པོ་ཁག་གི་གྲྭ་ཚང་སོ་སོར་མཁས་པ་རྣམས་ཀྱིས་མཛད་པའི་གཞུང་ཆེན་པོ་ལྔའི་སྤྱི་དོན་དང་མཐའ་དཔྱོད་སོགས་རྒྱས་བསྡུས་སྣ་ཚོགས་ཡོད་ཅིང་། མཁས་པ་འགའ་ཞིག་གིས་ནི་གཞུང་ཆེན་པོ་ལྔ་ཀ་ཆ་ཚང་བའི་སྤྱི་དོན་དང་མཐའ་དཔྱོད་བཅས་མཛད་ཡོད་པ་དང་འགའ་ཞིག་གིས་ནི་གཞུང་གཅིག་གམ་གཉིས་གསུམ་ལྟ་བུའི་སྤྱི་དོན་དང་མཐའ་དཔྱོད་བཅས་མཛད་པ་བཅས་ནི་མཁས་པ་སོ་སོས་རང་ཉིད་ཀྱི་སློབ་མ་རྣམས་ལ་སློབ་ཁྲིད་གནང་སྐབས་སློབ་དཔོན་རང་ཉིད་དང་། ཡང་ན་སློབ་མ་རྣམས་ཀྱིས་ཟིན་བྲིས་བྱས་པ་ཞིག་ཡིན། དབུས་གཙང་གདན་ས་ཆེན་པོ་བཞི་དང་། མདོ་སྨད་བཀྲ་ཤིས་འཁྱིལ།སྐུ་འབུམ་བྱམས་པ་གླིང་། དྭགས་པོ་བཤད་སྒྲུབ་གླིང་། དྭགས་པོ་མངའ་རིས་གྲྭ་ཚང་། ཅོ་ནེ་དགོན་ཆེན་བཅས་སུ་རང་རང་སོ་སོའི་གཞུང་ཆེན་པོ་ལྔའི་སྤྱི་དོན་དང་མཐའ་དཔྱོད་རྒྱས་བསྡུས་སྣ་ཚོགས་ཡོད་པའི་སྐོར་ཞིབ་པར་སྡེ་སྲིད་སངས་རྒྱས་རྒྱ་མཚོས་མཛད་པའི་༼ བེེ་དཀར་གཡའ་སེལ༽རིག་གནས་ལྔའི་བཤད་པའི་སྐབས་དང་། ཀློང་རྡོལ་བླ་མ་རིན་པོ་ཆེ་དག་དབང་བློ་བཟང་གི་མཛད་པའི་༼བཀའ་གདམས་པ་དང་དགེ་ལུགས་པའི་བླ་མ་རགས་རིམ་གྱི་གསུང་འབུམ་མཚན་ཐོ༽ཞེས་པའི་ནང་གསལ། གནའ་རབས་བོད་ཀྱི་སློབ་གསོའི་ལམ་ལུགས་ཐོག་གདན་ས་ཁག་དང་གྲྭ་ཚང་ཁག་སོ་སོར་གཏན་འཁེལ་བྱས་པའི་སློབ་ཁྲིད་ཟིན་བྲིས་གོང་དུ་བཀོད་པ་དེ་རྣམས་མ་གཏོགས་སློབ་ཁྲིད་མཛད་པོ་དགེ་རྒན་དང་སློབ་དཔོན་རང་རང་སོ་སོས་ཟུར་དུ་སློབ་ཁྲིད་ཟིན་བྲིས་རེ་བཀོད་པ་གནང་ན་ཟིན་བྲིས་གཅིག་གྱུར་ཞིག་ཡོང་དཀའ་བ་དང་། དགེ་རྒན་རྣམས་ཐུགས་ཐོག་ནས་སློབ་ཁྲིད་གནང་རྒྱུར་བྱང་གོམས་མཐོན་པོ་ཡོད་པའི་རྐྱེན་གྱིས་སློབ་ཁྲིད་ཟིན་བྲིས་ཟུར་དུ་འགོད་དགོས་པའི་དཀའ་ངལ་མེད་པ་རེད། དེང་སྐབས་ནི་འཆར་གཞི་ཞིབ་ཕྲ་ལྡན་པའི་སློབ་ཁྲིད་ལམ་ལུགས་ལག་བསྟར་བྱེད་ཀྱི་ཡོད་མ་ཟད། དུས་ཐུང་ལོ་གསུམ་བཞིའི་ནང་གལ་ཆེའི་ཆེད་ལས་སློབ་ཚན་མང་པོ་ཞིག་སློབ་ཁྲིད་བྱས་ཟིན་པ་དགོས་སྟབས་དགེ་རྒན་སོ་སོས་རང་རང་གི་གསུང་བཤད་རྒྱས་བསྡུས་འཚམས་ཤིང་གནད་ལ་ཁེལ་བའི་སློབ་ཁྲིད་ཟིན་བྲིས་རེ་ངེས་པར་དུ་འགོད་གནང་མཛད་དགོས་ཤིང་། མ་མཐར་ཡང་གསུང་བཤད་གནང་རྒྱུའི་དོན་ཚན་ཁག་གི་ས་བཅད་རྐང་གྲངས་ཙམ་གྱི་བརྗེད་ཐོ་ཞིག་ལས་མ་བྱུང་ཡང་ངེས་པར་འགོད་གནང་མཛད་རྒྱུ་གནད་ཆེན་པོ་ཡོད།།

 

支持此新闻
返回首页

དཔྱད་བརྗོད་སྤེལ་བ། ད་སྔ་སྡོམ་པས་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།